Timmisartoq seqerngup qinngorneranit nukimmik orsersorneqartoq

Timmisartoq nunarsuaq kaajallallugu timminiarnermini angalanerup immikkoortuisa arfineq pingajuat aallartippaa, tassalu Japanimiit Hawaiimut timminissaq. Immikkoortorlu taanna aamma nunarsuup kaajallanniarnerani ajornarnerpaavoq silami ajortissagaluarpat miffissaqannginnamik.

- Uteriarsinnaanngilagut. Hawaiimut kisimi angalavugut, timmisartumik misileraasut Twitterikkut allapput.

Timmisartullu aquttua André Borschberg Schweizimeersoq pillugu ima allapput:

- André Borschbergip uteriarnissamut killissaq qaangerpaa, tassalu allamut ingerlasinnaajunnaarpoq Hawaiimut kisimi, ullut tallimat unnuillu tallimat Hawaiimut angalassaaq.

Silap ajornera pillugu qaammat ataaseq kinguaattooqqalluni sapaatiummat unnukkut arfineq pingasunut kiisami Solar Impulse 2 qangattaqqippoq.

Timmisartoq Manerasuaq qulaallugu timminissap 7900 kilometerisut isorartutigisumi 1000 kilometerisut isorartutigisoq qaangereerpaa.

Timmisartoq ajutuussagaluarpat Borschberg kigaallassaaserluni pissittariaqassaaq. Umiatsiamik annanniummik pullattakkamik timmisartumi usivoq.

Timmisartup aquttarfia 3,8 kvadratmeterisuinnaq angitigaaq, issiavillu aquttup issiavia siniffittut anartarfittullu aamma atorpoq. Silaannaap aalarulunneranik naammattuuinngikkuni timmisartoq nammineq ingerlasinnaavoq, taamaalillunilu sinilaarsinnaalluni kisiannili 20 minutsikkaarlugit kisimi sinissinnaavoq.

Solar Impulsep sului 72 meterisut takitigipput taakkulu seqerngup qinngorneranit nukinnik tigooraassutinik qalleqqapput, tassa seqerngup qinngornerata nukiinik tigooraassutit 17.248-t nujamiit saannerit.

Timmisartoq ullukkut seqerngup qinngorneranit nukimmik katersisarpoq batterinut toqqorneqartartunik, batteriniillu unnuakkut timmisartoq orsersorneqartarpoq.

Timmisartumik taamak ittumik misileraanermi siunertarineqarpoq nukissanik allanit aamma katersisoqarsinnaanerannik ersersitsiniarneq, aammalu takuneqarnikuunngitsumik takutitsiniarneq.