Timmisartoq Nuummeersoq pissutaalluni Islandimi timmisartoqarfissuaq inuerutsinneqartoq
Islandimiut tusagassiorfiat mbl.is taama allaaserisaqarpoq.
Inuit timmisartoqarfimmiittut aneqquneqarput, taamaalioreermatalu isumannaallisaalluni nakkutilliivikkoorteqqinneqarlutik.
Taamatullu pisoqarneranut kukkusoqarsimanera pissutaavoq.
Timmisartoq Nuummeersoq Keflavikkimi timmisartoqarfimmut pingasunngormat mippoq. Tusagassiorfillu mbl.is naapertorlugu, Nuummi isumannaallisaalluni nakkutillineq nunani tamalaani piumasaqaatinik naammassinninngimmat Nuummit Keflavikkimut tikittut isumannaallisaalluni nakkutilliivik alla aqqutigisussaavaat.
Kukkusoqarneratigulli timmisartoq Nuummeersoq minnermi kingorna allamukartinneqarpoq, ilaasullu isumannaallisaalluni nakkutilliivik aqqutigeqqaarnagu timmisartoqarfimmut isersinnaasimapput inunnullu tassaniittunut akulerutiinnarlutik.
Isumannaallisaanermilu malittarisasat malillugit timmisartoqarfissuaq inuerunneqartariaqarsimavoq angalasussallu tamarmik isumannaallisaalluni nakkutilliivikkoorteqqinneqarlutik.
Angalasut 2-3.000-it taama pisoqarneranit eqqugaasimasut, mbl.is ilisimatitsivoq.
