Tasiilaq: Tillinniarnerit naamaarnerillu videuliuteqalernikkut akiorniaraat

- Unnuami taartumi umiatsiani serlersaarisoqartarpoq, benzinamik navianartorujummik naamaartoqartarpoq aserorterisoqartarlunilu, Ole Nuko, Tasiilami najukkami ataatsimiititaliami Kommuneqarfik Sermersuup ataaniittumi ilaasortaq, KNR-imut oqarpoq. 

Taamaammat videoliutikkut nakkutilliisoqalernissaa pisariaqarsorineqarpoq, tassami ukiorpassuanngortuni ajornartorsiutit taakkartorneqartut ajornartorsiutaasimasut najukkami ataatsimiititaliamit oqaatigineqarpoq. 

- Taamaattoqarnera pissutaalluni videoliuteqalernissaa najukkami ataatsimiititaliaminngaanniit pilersinniarsaraarput, qanoq pisoqartarnera malinnaaffigisinnaanngorniassagatsigu, Ole Nûko oqarpoq. 

Innuttaasut videoliutikkut immiussat susassaqanngitsunit takuneqarnissaat ernummatigisariaqanngikkaat oqaatigineqarpoq. Tassami politiit kisimik immiussat takusinnaassagaat siunertaasoq, Ole Nûko ilisimatitsivoq. 

Videoliutikkut nakkutilliisalernissamut 126.000 koruunit aningaasartuutigineqassapput, aningaasallu taakku suliniutinut timersornermut piorsarsimassutsimut pinaveersaartitsinermullu piviusunngunngitsoorsimasunit tiguneqarsimasut najukkami ataatsimiitsitaliap oktobarip 23-ani ataatsimiissimanerani imaqarniliami allassimavoq.