Tiliup Ivaaqqami annertuumik innarluutillip erninera qisuariarfigaa
- Pisoq alianarluinnarpoq tamaattoqarsimassussanngikkaluarporlu.
Innarluutillit illersuisuat, Anja Hynne Nielsen nunatsinni ippassaq aalassassutaangaatsiartoq pillugu oqarpoq.
- Niviarsiannguamut qanigisaannullu, sunnerneqartunullu tamanut ajorluinnarpoq. Suliap ilungersunartup takutippaa arlalitsigut kukkuluttortortoqarlunilu sumiginnaasoqartoq, naak taakku arnap pineqartup inatsisitigut illersugaaneranik, isumannaatsuunissaanik, ataqqinassusaanik kiisalu pinngitsaalineqarnissaanut illersuisussaagaluartut.
Suliaq arnamut 23-nik ukiulimmut, annertuumik innarluuteqartumut Qaqortumilu innarluutillit illuanni Ivaaqqami najugaqartumut tunngavoq.
Taassuma kinguaassiutitigut atornerlunneqarluni naartulersinneqarsimanissaa ilimanarpoq, tallimanngormallu ernertaarpoq. Taassumali ernisulinnginnerani naartunera kimilluunniit ilisimaneqarsimanngilaq.
AAMMA ATUARUK Annertuumik innarluutilik tallimanngormat erneriasaarpoq – ulloq unnuarlu angerlarsimaffik politiinut nalunaarutigineqarpoq
Qaqortumi politiit Ivaaqqami kinguaassiutitigut atornerluisoqarsimasinnaanera pillugu nalunaarfigineqarlutik uppernarsarpaat. Pisorli misissuiffigineqaqqissaarnera pissutigalugu piffissami matumani suliamut atatillugu oqaaseqarsinnaanani immikkoortortaqarfiup pisortaa, Søren Hansen oqarpoq.
Nuna tamakkerlugu misissuisoqalersoq
Meeqqanut, Inuusuttunut Ilaqutariinnullu Naalakkersuisoq, Mimi Karlsenip (IA) nuna tamakkerlugu ulloq unnuarlu paaqqinniffinni pissutsinik misissuisoqarnissaanik aallartitsilluni KNR-imut ippassaq oqaatigaa.
Arnap naapertuilluanngitsuliorfigineqarsimanissaa Tiliumit qularutigineqanngilaq.
Ivaaraq. Assi: KNR
- Suliaq pinerliineruvoq. Pissusissamisoorpoq suliaq politiinit, naalakkersuisunit naalakkersuisoqarfimmiillu pimoorunneqarluni suliarineqalermat, piaartumillu iliuuseqarmata, Anja Hynne Nielsen oqarpoq.
- Akuersaarneqarsinnaanngilaq, arnaq annertuumik innarluutilik, oqalussinnaanngitsoq qanoq ingasatsigisumilluunniit nassuianeqarsinnaanngitsumik kinguaassiutitigut atornerlunneqartarnera paasineqanngitsoorsimammat. Tamatumalu kingunerisaanik naartunera paasineqanngitsoorluni tallimanngormat ernimmat. Neriuutigilluinnarpara arnaq suliaminnut ilisimasalinnit kiisalu immikkut ikiorserneqassasoq, aamma erloqinartumik atugaqartinneqarsimanera annertuumillu innarluuteqarnera eqqarsaatigalugit sulisoqassasoq, innarluutillit illersuisuat oqarpoq.
Atornerlunneqarnissaat marloriaammit pingasoriaataanut aarlerinarnerusoq
Tiliup oqarnera naapertorlugu meeqqat arnallu innarluuteqartut inunnut innarluuteqanngitsunut sanilliullugit kinguaassiutitigut atornerlunneqarnissamut marloriaammit pingasoriaataanut aarlerinartorsiornerusarput.
- Takornartaanngilaq nunatsinni ulloq unnuarlu angerlarsimaffittut aaqqissuussani atornerluisoqartarnera, Anja Hynne Nielsen oqarpoq.
AAMMA ATUARUK Mimi Karlsen om multihandicappet der fødte: Alle dem, der har været nærheden af hende, skal undersøges
- Tiliumut saaffiginnissutigineqartartut tamakkiisut isigissangaanni taava pingasut, najugaqatigiiffinni kinguaassiutitigut atornerluisoqarneranut tunngasumik qanoq iliuuseqartoqarnissaanut apeqquteqartoqarluni saaffiginnittoqartarnikuuvoq. Pisinnaatitaaffiit pillugit siunnersuisarnermi politiinut ingerlatitseqqiineq, sakkortusisamik nalunaaruteqartussaatitaaneq naapertorlugu nalunaarutiginninnerit kiisalu eqqortumik maalaarfissanut siunnersuinerit pisarsimapput.
- Isumalluutigineqartut maannamut tamaviaartinneqarput, sulisussaaleqisoqarpoq, avatangiisinut sinaakkutinut aningaasaliisarnerit annikipput aamma aningaasaliissutit amingaataapput. Uani pisumi, ersarippoq meeqqanut aamma arnanut innarluutilinnut kinguaassiutitigut innarliisarnerit pinaveersaartinniarlugit iliuuserineqartartussat, periutsit aamma pinaveersaartitsinerit pillugit paasissutissat tigussaasut amigaataammata.
