Tikaagullittassanik nutaamik agguaassisoqalersoq
- Nuussineq piniarnermi killiffik aamma pisassiisoqarnissaanik qinnuteqaatit tiguneqartut tunngavigalugit pissaaq, Aalisarnermut, Piniarnermut Nunalerinermullu Naalakkersuisoq taama ilisimatitsivoq, peqatigisaanillu aamma erseqqissaatigalugu ataatsimoorluni tikaagullinniarneq najukkami aalisartut piniartullu peqatigiiffiata kommunalbestyrelsimit tusarniaaffigineqareernerata kingorna aatsaat aallartinneqarsinnaasoq.
Qamutilissorluni tikaagullittassanit Kitaani ataatsimoorluni tikaagullinniarnermi pisasiissutinut qaammatit marluk iluanni aappassaanik nuussisoqarpoq. Qamutilissorluni pisassiissutinit ataatsimoorluni tikaagullinniarnermi pisassiissutinut qulinik septembarip qaammataani aamma nuussisoqarpoq.
Tikaagullittassiissutaaqqaartut tassaagaluarput ataatsimoorluni tikaagullittassat 45-t qamutilissorlunilu tikaagullittassat 119-it. Qamutilissorlunili tikaagullinniarneq ataatsimoorluni tikaagullinniarnermut malinnaasinnaasimanngilaq.
Oktobarip 27-at killiffigalugu - tassa ippassaani - Kitaani tikaagulliit ataatsimoorluni pisassat arfiniliinnanngorput qamutilissorlunilu tikaagullittassat 34-ullutik, Tunumi tikaagulliit aqqanillit pisarineqarsimapput pisassiissutit sisamanik sinneqalerlutik.
Kitaani ataatsimoorluni tikaagullinniarnermi pisassiissutinut qulinik nuussinermi, arfinillit Qaasuitsup Kommunia, Qeqqata Kommuniani ataaseq pingasullu Kommune Kujallermut nuunneqassapput. Kommuneqarfik Sermersuuo Kitaanut tikaagullittassanik nuussisoqassanngilaq, Tunumili tassa Illoqqortoormiunit Tasiilamut pisassiissutitut marluk nuunneqassallutik.
Kitaanut tikaagullittassiissutigineqartut tamarmiusut ukiormanna 164-iupput, Tunumullu 15-iullutik.
