Terianniat perlerorsinnaanerat Alluitsup Paani ernummatigigaat

Kujataani nunaqarfiit ilaanni Alluitsup paani terianniat ulluni makkunani ajornartorsiutigineqarput. Inuit arlaqartut niumikkut kiineqareersimapput. Terianniat perlerortuusorineqarmata mianersoqqusisoqarpoq.

Alluitsup paani nunaqarfimmiut ilaat sisamanngormat unnukkut singernermigut terianniamit kiitissimavoq.

- Tununninngaanniit kiillunga saassuteriataaraminga. Qujanartumik qisummik anaatassamaateqarallartillunga annerusumik susoqanngilaq , Jens Jørgen Frederiksen oqarpoq.

Tupassimaqaarli.

- Assorsuaq tupannarpoq. Eqqaamarpianngilaraluunniit tupangaarama. Aamma nipaa ersinarnermik.

- Inuit allat aamma marluk kiitinnerma nalaani, siusinnerulaartukkut kiitissimapput. Kisianni qujanartumik støvliisigut kiineqarsimagamik, Jens Jørgen Frederiksen oqarpoq.

Terianniat toqunneqartarput

Terianniat ilaat perlerorsorineqarmata nunaqarfimmi Kommune Kujalliup sulisuinit nakkutigineqartariaqalersimapput.

- Terianniat illoqarfiup iluaniitinnaveersaarneqarput. Taava qimaagaangata illoqarfiup ungataanut pigaangata seqqorfigineqarsinnaangoraangata, aammalu sissamut pigaangata seqqorfigineqartarput, toqunneqartarput, Annassi K. Karolussen nunaqarfiup allaffianeersoq taama oqarpoq.

Terianniat pingasut maannamut toqunneqareersimapput. Ukioq mannalu amerlanerunerat maluginiarneqarpoq.

- Siornatigut qaqutigoorput. Kisianni ukioq manna malunnaqaaq ukiariartornerani taamak amerlatigisut maani nunaqarfitta iluani tusarsaasaqattaarmata.

Terianniamik takusoqaraangat kiitittoqarpallu periusissat nunaqarfimmi takussutissiarineqarsimapput.

- Allagartaliisaqattaarpugut nunaqarfitta iluani teriannianut tunngasunik. Taava aamma periusissat allattorneqarlutik. Neriuppunga innuttaasut aamma malinnaaffigilluassagaat.

Sakkulerluni aneertariaqartoq

Terianniamillu kiitissimasoq avaarsimagami anissagaangami pisuttuassagaangamiluunniit arlaannik sakkulerluni aatsaat aneertariaqartalersimavoq.

- Sakkoqarluni aneertariaavoq aatsaat, Jens Jørgen Frederiksen oqarpoq.

Sulilu terianniat takuneqallattaammata mianersoqqusisoqarpoq.

- Mianersortariaqaqaat inuit taamak terianniaqartigisoq. Ullaaq aamma terianniaqarpoq. Annilaanganaqaaq toqqissisimananngilaq, Jens Jørgen Frederiksen naggasiivoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!