Telepost: Attaveqaqatigiinneq GE-mit naleqarneruvoq
Taamaalillutik GE-mut ilaasortaanermut ukiut tamaasa akiliutaasartoq sipaarsinnaanngorsimallugu, Steen Montgomery-Andersenip KNR-imut oqarpoq.
- GE-mut ilaasortaanermut 500.000 koruuninik ukiut tamaasa akiliisarpugut, Steen Montgomery-Andersen oqarpoq.
Nunatsinni suliffeqarfiit amerlanerpaartaasa akissarsiatigut isumaqatigiinniarnerni, GE isumaqatigiissitsiniartartoraat. TELE-POSTilli tamanna maqaasissanagu oqaatigaat, tassami Namminersorlutik Oqartussat akissarsiatigut ingerlatsineri isumaqatigiinniartarnerilu, TELE-POSTimit atorneqartuarmata, Steen Montgomery-Andersen aamma oqarpoq.
TELE-POSTili CSR Greenlandimut, sulisitsisut peqatigiiffiannit ingerlanneqartumut ilaasortaaginnassaaq taamatullu peqquserluttuliornermut akiuiniarnermik suliniaqatigiiffimmut, Transparency International Greenlandimut ilaasortaaginnassallutik aamma UN Global Compactimut taamatullu Dansk Industrimut ilaasortaanertik ingerlatiinnarniarlugu, Steen Montgomery-Andersen oqarpoq.
- Danmarkimi Dansk Industrimut ilaasortaavugut maannalu taakku isumaqatigiinniarfigaagut ilaasortaaginnarnissarput ingerlatiinnarniarlugu.
Steen Montgomery-Andersen aamma oqarpoq GE-mut ilaasortaanngikkaluarlutik suliniaqatigiiffinnut allanut attaveqarsinnaanertik ingerlatiinnarsinnaagamikku.
- GE-mut ilaasortaanerup saniatigut Kalaallit Nunaanni attaveqaqatigiinnissanut periarfissat amerlaqaat, Steen Montgomery-Andersen oqarpoq.
Taassuma naqissuserpaa, GE-mut ilaasortaajunnaarnertik pissuteqanngimmat, naalakkersuisooqatigiilersunit GE oqaatiginiarneqartarmat taakku partiilersorpallaartartut.
- Naalakkersuisooqatigiinnit politikki toqqammavigalugu ilaasortaajunnaarnissatsinnik tinnersarneqarneq ajorpugut. Ilaasortaajunnaarnitsinnut pissutaasoq tassaatuaavoq, aningaasanik taama amerlatigisunik atuisarnerput nalilersoreerlutigu ilaasortaajunaarnissarput qinersimagatsigu.
TELE-POST Greenlandimi pisortaanerugallartoq, Steen Montgomery-Andersen oqarpoq.
TELE-POSTip GE-mut ilaasortaajunnaarnernut atatillugu, suliffeqarfik naalakkersuisunit tatisimaneqarnerulernissaa, pisortaanerup aarleqqutiginngilaa, Steen Montgomery-Andersenillu naqissuserlugu suliffeqarfik politikerillu akornanni ataqqeqatigiinneq pitsaasuusoq.