Telemi pisortaq: Avinngarusimanerusut unammillernartuupput pingaarutillit
Telemit attaveqaatit atorlugit Nunarput ataatsimoortinneqarporlusooq, Kristian Reinert Davidsem isumaqarpoq.
- Attaveqaatit nuna tamakkerlugu ataqatigiissinneqarnissaat oqimaaqatigiissinneqartussaavoq aamma qanoq tamassuma pilersinneqarnissaa iluamik eqqartugassaalluni, Kristian Reinert Davidsen oqarpoq.
Taanna Savalimmiuni Føroya Telemi pisortatut sulinermini, unammillernartumik assingusumik suliaqarnikuuvoq.
- Tassalu tamannarpiaq attaveqaatinik suliaqartut pingaarnertut suliassaat soorlu aamma uanga ukiuni kingullerni qulingiluani attaveqaatit pillugit suliaqarninni anguniarsimasara, tamanna pisimalluni qeqertat amerlasuut nunaqarfiillu isorliunerusuniittut pitsaasumik attaveqaatitigut sullinneqarnissaat anguniarsimallugu, tamanna oqittuinnaasimanngilaq. Taamaattorli tassa tamannaavoq attaveqaatinik suliffeqarfissuit anguniagassaat pingaarneq, Kristian Reinert Davidsen, Føroya Telemi pisortatut ukiut qulingiluat sulereerluni TELE-POST-imi pisortaanertut sulilertussaq, oqarpoq.
