Tele-Postip ilaasortaajunnaarnera GE-p ajuusaarutigaa

Kalaallit Nunaanni inuussutissarsiortut GE, Sulisitsisut Peqatigiiffiannik GA-mik siornatigut taaguuteqartut Tele-Postimit ullumi ilisimatinneqarput Tele-Post GE-mi ilaasortatut tunuarniuteqartoq.

Tele-Postip GE-mi ilaasortaajunnaarnissani eqqarsaatersuutigigaa KNR-ip ippassaq oqaluttuarereeraalu GE ullumi taama nalunaaruteqarpoq.

Tele-Postip taama aalajangernera GE-p pisortaata Brian Buus Pedersenip ajuusaarutigaa, Tele-Postilli taama iliuuseqarnera tupinnartortaqanngitsoq erseqqissaatigalugu:

- GE-p ilaasortaqassutsimigut ima isumannaatsigaaq aningaasatigut maannangaaq ajornartorsiulernavianngitsoq. GE-p suliassamisut anguniakkani allannguuteqanngitsumik taamaammat ingerlateqqissinnaavai, Brian Buus Pedersen KNR-imut oqarpoq.

Tele-Postilli ilaasortatut maqaasineqarnissaa aamma erseqqissaatigaa:

- GE-p ilaasortai amerlaqaat, suliassaqarfinnit assigiinngitsuneersorpassuupput, nunamilu siaruaassimasorujussuullutik. GE-mi ilaasortaajunnaarnissani Tele-Postip maanna aalajangerpaa, GE-p inuussutissarsiornermut atatillugu anguniagaanut peqataajumajunnaarluni. Tele-Post GE-mi maqaasiumaarparput, Brian Buus Pedersen oqarpoq.

Qarasaasialerinermut atatillugu politikkini GE-p allanngortinnavianngikkaa taassuma oqaatigaa,  soorlu aamma Tele-Postip inuiaqatigiinnut pingaaruteqassusaa aamma ataqqigitsik:

- Taamaaliunngikkuttami tutsuiginarnavianngilagut, Buus Pedersen oqarpoq.

- Tele-Postip qarasaasialerinermut, attaveqarnermut tusagassiuuteqarnermullu ataatsimiititaliami ilaasortaanera maqaasissavarput, tassami ilaasortaammat oqaloqatigiilluartarlutalu attaveqaqatigiilluartaratta, GE-p pisortaa Brian Buus Pedersen KNR-imut oqarpoq.