Tele-Postip emaili atorunnaarsikkaa
TELE-POST-ip 2020-p tungaanut periusissiaani anguniakkat ilaagaat piuminarsaanissaq aamma pingaarnertut kiffartuussissutissanik pingaarnersiuinissaq. Suliamut tassunga atatillugu e-mailinut systemi greennet.gl-i atorunnaarsinneqassasoq TELE-POST-i nalunaaruteqarpoq.
Allakkat elekroniskiusut Nunatsinni atorneqarnerulernissaat siunertaralugu Greennet.gl-i pilersinneqarnikuusoq TELE-POST tusagassiuutinut allappoq.
- Tamannalu anguneqarsimasoq oqaatigineqarsinnaavoq, TELE-POST-imi tuniniaanermut pisortaq Brian Smedemark tusagassiuutinut nalunaarummi oqarpoq.
Greennet.gl-ip atorunnaarsinneqarnissaanik aalajangernermi nukiit nioqqutissanut kiffartuussissutissatullu neqeroorutinut allanut atorneqarnissaat TELE-POST tunngavilersuivoq. Assersuutigalugu internettimik aamma oqarasuaatinut angallattakkanik tunisassiat suliarinissaannut nukissaqarnerulersitsissasoq TELE-post allappoq.
Greennet.gl-imik atuisut atuisutut isumaqatigiissutitik taamaatereerunikkit 2019-mi januaaip 20-at tikillugu greennet.gl-imi allagaatitik pissarsiarisarsinnaassagaat suliffeqarfik ilisimatitsivoq. Greennet.gl ukioq manna septembarip 20-at ilanngullugu atorneqarsinnaassaaq.