Tele-Post Savalimmiormiumik pisortartaarpoq

Qaammatini qulini pisortaagallartumik pisortaqartareerluni Tele-Post maanna nutaamik pisortartaartussanngorpoq. Savalimmiormiup Kristian Reinert Davidsenip, Savalimmiunilu taamatut atorfeqarsimasup Nunatsinni oqarasuartaateqarneq akisussaaffigilissavaa.

Allattoq Camilla Dam

juulip 03-at 2015 09:05

Nutserisoq Elisa Isaksen

Kristian Reinert Davidsen Savalimmiuni 2006-imiilli Føroya Telemi pisortaaneruvoq.

- Kristan sulinermigut qaffakkiartornermini aammalu ukiuni kingullerni Føroya Telemi sulinermigut assorsuaq angusarissaarpoq. Piginnittunik, sullitanik sulisunillu suleqatigiinneq pitsaasoq aqqutigalugu tamakkua angusimavai. Suleqatigiinnissarput qilanaareqaara, siulersuisuni siulittaasoq Stine Bosse oqarpoq.

Kristian Reinert Davidsen 48-nik ukioqarpoq, civilingeniøritut ilinniarsimavoq aammalu aaqqissuussaanermut aqutsinermullu HD-mik ilinniagaqarluni. Nalunaarasuartaaserinermik suliaqarfimmi suliuaannarsimavoq. Kristian Reinert Davidsen atorfittaaminut periarfissami siullermi sulilissaaq, kingusinnerpaamik ulloq 1. januar 2016 sulilissalluni.

Aamma atuaruk Stine Bosse Tele-Postimi siulittaasunngortoq

Tunuartorpassuit

Siulersuisut siulittaasuannik Agner Markimik suleqateqarnikkut ajornartorsiorneq pissutigalugu Michael Binzer pisortatut atorfimminit siorna septembarip qulinganni tunuareersorlu, pisortap tullia Steen Montgomery-Andersen pisortaanerugallartussatut ivertinneqarpoq. Pisortaagallarninili aamma suleqateqarnermigut ajornartorsiuteqarnini pissutigalugu apriilimi taamaatiinnarmagu, tamatuma kingorna siusinnerusukkut KNR-imi pisortaasimasoq Søren Lennert Mortensen pisortaagallartussatut ivertinneqarpoq.

Aamma atuaruk Michael Binzer TELE-POST-imi atorfimminit tunuarpoq

Siulersuisunngortup periarfissarpassuit piviusunngortikkusuppai

Siulersuisut maajip 27-anni ataatsimiinneranni Stine Bosse siulersuisunngortunut nutaamik siulittaasunngorpoq. Siulersuisuni ilaasortanngortut ilaatigut tassaallutik Arctic Winter Games 2016-ip pisortaa Maliina Abelsen (IA-p aningaasaqarnermut naalakkersuisuutitarisimasaa). TDC-p teknologimi pisortaa Kim Søgård Kristensen aamma eqqartuussissuserisoq Ulrik Blidorf.

Tele-Post nutaamik pisortaqalernermigut siumut isigaluni suliniuteqaqqissinnaanngorpoq.

- Sulilernissara aammalu sulisunik siulersuisunillu suleqateqarnissap pingaarutillip aallartinnissaa qilanaaraakka. TELE-POST-i periarfissarpassuaqarpoq pissanganartunik, tamakkulu ukiuni aggersuni piviusunngortissinnaanerannut suleqataanissara qilanaaraara, Kristian Reinert Davidsen oqarpoq.

Aamma atuaruk KNR-ip pisortarisimasaa Tele-Postimi taartaagallartoq