TELE-POST-ip ukiumoortumik angusai isertitatigut kinguariarfiusut

Tele-Post 2014-imi 68,9 millionit koruuninik angusaqarpoq ,2013-imut naleqqiullugu 25,4 millionit koruuninik ikinnerullutik missingersuutigineqartuniillu aamma ikinnerullutik.

Piginnittut, Namminersorlutik Oqartussat, iluanaarutisiassaat 32,0 millionit koruuniussapput, ukiumoortumik angusat akileraarutit ilanngaatigereerlugit 69%-iisut amerlatigissallutik.

Siornamullu naleqqiutissagaanni tamanna annikinnerungaatsiarpoq, Namminersorlutimmi Oqartussat siorna 47 millionit koruuninik iluanaarutisiassaqartinneqarmata.

TELE-POST tusagassiorfinnut nalunaaruteqarluni taama allappoq.

Aamma atuaruk KNR-ip pisortarisimasaa Tele-Postimi taartaagallartoq

- Oqarasuaatinik angallattagaqarnermut, internettimut aamma paasissutissanut kiffartuussissutinut akit malunnaatilimmik appaaviginerisa kinguneraat naatsorsuutigisatsinnut naleqqiullutik kaaviiaartitat appangaatsiarnerat. Taamaakkaluartoq angusaq suli naammagisimaarparput. Ukioq 2014 ukiuusimavoq ’Sassarta 2014-18’-imik ingerlatsiviusoq siulleq, suliniutillu amerlasuut aallartinneqarput, Tele-Postimi pisortaanerugallartoq Søren Lennert Mortensen TELE-POST-ip iliuusissatut pilersaarutaa innersuussutigalugu taama allappoq.

TELE-POST-ip amerlanerusunik sulisoqarneq pissutigalugu missingersuusiarineqartunit aningaasartuuteqarnerusimanini angusarissaarpallaannginnerminut tunngavilersuutigaa. Tamatumunnga ilanngullugu namminersortunngorsaanermik suliaqarnerup piumasaqaateqarfiusimanera aammalu ingerlatseqatigiiffimmut aningaasartuutitigut annertuumik malunnarsimanera, siunnersortinullu avataaneersunut aningaasartuuterpassuarnik kinguneqarsimanera tunngavilersuutigineqarpoq.