Tele Post akinik appaanialerpoq
Ukioq manna sinneqartoornerunermut pissutaasut pingaarnerit marluk ukuupput: Oqarasuaatit angallattakkat atorlugit internetimik atuisoqarnerulernera, aamma allaffissornikkut sipaarniartoqarnerata iluatsinnera.
Sinneqartoorutit taakkua 58 millioner koruuniusut atorluarneqassasut pisortaanerugallartup Steen Montgomery-Andersenip neriorsuutigaa.
Tassami immap naqqatigut kabelip suli pitsanngorsarneqarnissaanut, oqarasuaatit angallattakkat aqqutaanik piorsaanermut, aamma sinerissami radiomut attaveqaatit pitsanngorsarneqarnissaannut sinneqartoorutit atorneqassasut neriorsuutigai. Taakkuinnaanngillalli, tassami oqarasuaatit atorlugit internetimut attaveqaatinut akitsuutaasartup minnerulernissaa TELE-POST-ip oqartussaasunut qinnutigereerpaat, tassalu akit 50 procentit angullugit apparsinnaanissaat ilimagineqarsinnaalluarluni.
Aamma suliffeqarfiit iluini attaveqaataasartup "MPLS VPN"-imik taagorneqartartup akiisa affaannanngortinneqarnissaa siunniunneqarsimasoq nalunaarutigineqarpoq.
Akilli qaqugorpiaq apparneqassanersut Tele Post-imi pisortaanerup massakkorpiaq oqaatigisinnaannginnerarpaa. Tele-mmi akinik appaanissamut qinnuteqaataa siulleq Telestyrelsimut marsip qiteqqunneranili nassiunneqarmat, aappaalu juunip aallartinnerani nassiunneqarsimalluni, ullorlu manna tikillugu suli akissutisisimanatik.
Tele-p allakkerivii ilimagisamit ingerlalluarnerusut aamma nalunaarutigineqarpoq, tassalu allakkanit isertitat siornamut naleqqiullugit procentinik sisamarsuarnik amerleriarsimallutik, aali allakkat qarasaasiakkut nassiussat nunarsuatsinni atugaaleraluttuinnaraluartut.
Isertitalli tamakkiisut siornamut nallersuutissagaanni ukioq manna akileraarutit suli akilernagit 90 millionit koruuninik sinneqartooruteqarnissaq Tele-mi siulersuisut naatsorsuutigilereerpaat. Siorna sinneqartoorutit 71 millionit koruuniupput.
