Tele nunatsinni suliaqarnerulissasoq

Tele Greenlandip nunani allani ingerlatsinini allanngornialerpaa. Taamaammat nunani allani soorlu Afrikami telemut tunngasunik sulianik ingerlatsineq aallunneqarunnaassaaq, qaninnerusumilu suliffeqarfiutit salliutinneqalerlutik. Tele Greenlandip pisortaa Brian Buus Pedersen ima oqarpoq:

 Aalajangerpugut nunani allani telemut tunngasunik atortorissaarutinik kiffartuussinernillu sullissinerit tamaasa taamaatitinniarlugit. Nunarsuarmi niuerneq eqqarsaatigalugu TGI unammillernissaminut mikivallaarpoq, niuernermilu ingerlatanut unammillerniarneq ajornarluni. Ingerlaannarutta ajutoorlutalu Kalaallit Nunaanni atuisut akiliisussaassapput. Aalajangerpugut qaninnerusumi sulianik pisinnaasaqarfigilluakkatsinni suliat pingaarnerullugit ingerlalerniarluta.

Ukiuni kingullerni nalunaarasuarnermut ingerlatsiviit  imminut akilersinnaajunnaariartorput, immitsinnullu oqarfigisariaqalerpugut ingerlaaserput allanngortariaqalersoq. Nunani allani suliffeqarfinnik ingerlatsineq misiligutaavoq, paasiniaratsigu imminut akilersinnaanersoq, taamaalilluni oqartoqarsinnaanngilaq uagut kukkussuteqarsimasugut, sapiillisaarlunimi misiliinngikkaanni paasisaqartoqarsinnaanngimmat.

Maannakkut ingerlaaserput allanngorlugu qaninnerusumi sullissinerit pingaarnerullugit ingerlatilissavavut. Nunatsinnimi nalunaarasuarnerup ingerlarnga eqaannerpaamik ingerlatilernialerparput, Tele Greenlandip pisortaa Brian Buus Pedersen nassuiaavoq.

 Tele Greenlandip ilimasaarutigeqqammerpaa suliffissat arlallit Københavnimiit nunatsinnut nuunneqassasut.