Teater Solaris nersornaasigassatut innersuunneqartoq

Isiginnaartitsisartoqatigiit Teater Solaris, isiginnaartitsissut "Nalusuunerup taarnerani" pillugu nunani tamalaani isiginnaartitsisartunut nersornaasiuttakkamut "Il Teatro Nudo di Teresa Pomodoro"-mut innersuunneqarput.
Assi © : KNR
Allattoq Karsten Sommer
maajip 19-at 2017 09:01
Nutserisoq Simon Uldum -

Italiamiut nersornaasiuttagaat isiginnaartitsisartoqatigiinnut isiginnaartitsissutinullu "ataqqinassutsip silarsuarmiullu kiisalu tamatta naleqartitatta kimianik" ujartuisunut tunniunneqartarpoq, nersornaasiuttakkap siunertaa pillugu immikkoortumi taama allassimasoqarpoq.

Teater Solarisip Inuit Theatre Company suleqatigalugu isiginnaartitsissusiaa, Nukaaka Coster Waldauimit pingaarnertut inuttaaffigineqartoq Ole Kristiansenillu nipilersuusiorfigisimasaa, alaatsinaanneqartupilussuusimavoq.

Isiginnaartitsissut 2016-imi upernaakkut takuteqqaarneqarpoq, Danmarkimilu Nunatsinnilu angallanneqarluni takutinneqartarsimalluni.

Isiginnaartitsissut Katuap ukioq manna februaarip qaammataani ukiunik 20-nngortorsiornerani ilaatigut takutinneqarpoq kingornalu sinerissami illoqarfinnut arlalinnut angallanneqarluni.

Isiginnaartitsissut " Nalusuunerup taarnerani" Italiap avannaani illoqarfimmi Milanomi isiginnaartitsisarfimmi Spazio Teatromi maajip 24-ani 25-anilu takutinneqassaaq. Isiginnaartitsinerlu Teater Solarisip Facebookimi qupperneratigut maajip 24-ani nalunaaqutaq ualikkut tallimanit toqqaannartumik aallaakatinneqassaaq.

Isiginnaartitsisartoqatigiit nersornaaserneqassanersut novembarip qaammataani aalajangiiffigineqassaaq.