Taylor Swift nipilersukkanik saqqummersitaminik rekordiliivoq

Amerikamiu erinarsortartoq Taylor Swift tallimanngormat aqqanilissaanneerluni saqqummersitsivoq "The Tortured Poets Department".

Saqqummersitsinerup aallartinneranit akunnerit 24-t qaangiuttut, aatsaat taama amerlatigisut nipilersornermut kiffartuussivimmi Spotifymi, 200 millionit sinneqartut tusarnaareersimavaat.

Taama aliikkutassianik tusagassiivik Variety allaaserinnippoq.

Kisitsit aatsaat taama qaffasitsigisoq suli qaffasinnerusinnaavoq, nalunaarutigineqareermat nalunaaquttap akunneri 15-it missaat ingerlaneranni kisitsisit taakku naatsorsorneqarsimammata.

Naak saqqummersitsinnginnermi Taylor Swft rekordileereersimavoq.

"The Tortured Poets Department"-imi aatsaat taama angusarissaartigaaq, saqqummertussaanera sioqqullugu tusarnaagassatut toqqorneqarnerpaajusimammat.

Saqqummersinneqartoq nipilersukkanik 16-inik imaqartussaasimavoq, kingornali Taylor Swiftip Instagramimini nipilersukkanik ilassutinik 15-inik allanik imaqartoq nalunaarutigivaa.

Ukiuni kingullerni marlunni taallianik allattarsimavunga, taamaammat aamma avitseqatigerusuppassi, taakkulu TTPD-mi saqqummersippakka (The Tortured Poets Department), aaqqiss.) saqqummiussami taama allappoq.

Millionilikkuutaat Taylor Swift Spotifymi tusarnaartaarpaat, ulloq ataasiinnaq saqqummersissimasai pingasut tusarnaarneqarnerpaajupput.

Siullermeertumik "Midnights" aamma "1989 (Tayor's Version)" saqqummersitaalu kingulleq tusarnaarneqarnerpaani pingajuusimapput.

Taassuma "The Tortured Poets Department"-ip saqqummerneranut atatillugu, eqqumiitsuliortutut tusarnaarneqarnerpaatut aamma rekordiliivoq.

Erinarsortartoq 34-nik ukiulik "1989" (Tayor's Version) 2023-mi oktobarip qaammataani saqqummermat, nammineerluni rekordiliarisimasani qaangerpaa, tassa ullup ataatsip ingerlani tusarnaarneqarnerpaatut inissilluni.

Taylor Swift 2023-mi Time Magazinemi Ukiormi tassani Inuttut immikkuullarissutut toqqarneqarpoq.

Apriilimi siusinnerusukkut atuagassiami Forbesimi, nunarsuatsinni pisuujunerpaat allattorsimaffianni siullerpaamik saqqummerpoq.

Forbesimi allaatigineqarnera naapertorlugu aningaasat 1,1 milliardit dollarit nalinginut - tassa 7,7 milliardit koruuninik aningaasaateqarpoq.