Canada: A Taste of the Arctic iluatsilluaqqittoq

Canadami suliniaqatigiiffik, Inuit Tapiriit Kanatami, Canadami illoqarfiit pingaarnersaanni Ottawami pingasunngormat unnukkut ukiumoortumik katerisimaartitsivoq.

Katerisimaartitsineq taanna Ottawami katerisimaartitsinerit nuannarineqarnerpaat ilagilersimavaat, isissutissallu katerisimaartitsinissaq qaammatinik arlalinnik sioqqullugu tamakkerlugit pisiarineqareersimapput. Ottawami politikkikkut inuussutissarsiornikkullu siuttuusut, naggueqatigiit Inunneersut allallu 350-it 500-llu akornanniittut naggueqatigiit Inuit nerisassiaat kulturiallu misigisassarsiorfiginiarlugit katersuupput.

Katerisimaarneq taaguuteqarpoq "A Taste of the Arctic" - Issittormiut nerisassiaat.

Najuuttorpassuillu, akiliingaatsiarlutik peqataasut, mamartulianik assigiinngitsorpassuarnik ussigassaqartinneqarput, soorlu puisip neqaanik, tuttup neqaanik, kapisilinnik umimmaallu neqaanik igaat paarnallu issittumeersut.

Tamakkumi qaqutigoortuupput unnullu taanna allaanerulluinnartumik nerisassiarineqarlutik sassaalliutigineqarput.

Issittormiut nerisassiaannik ussigassaqartitsisoqaannanngilaq, aamma issittormiut nipilersoriaasiannik nutaaliaasunik poppimik rappimillu aliikkusersuisoqarpoq, ilaatigut torlussortut qilaatersortullu peqatigalugit.

A Taste of the Arcticilu ima nuannarineqarluartigilersimatigaaq Ottawami eqqumiitsulianik katesugaasivissuarmi ukioq manna ingerlanneqarluni, peqataasullu Inuit Tapiriit Kanatamip siulittaasuanit, Natan Obedimit, inuit kulturiata nalliuttorsiutiginissaanut tikilluaqquneqarput.

 

Isummersuutit

Inatsisartut Upernaakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!