Assi: Esther Zeeb

Tassaarsuarneranit eqqugaasut taperserneqarluartut

Nunatta avannaani arfininngornermi tassaarneranit eqqugaasunut tapersiiniartorpassuupput.

Uummannap eqqaani nunaqarfimmi Nuugaatsiami arfininngornermi unnukkut qulinngunngitsiartoq tassaarpoq. Nunaqarfimmi illorpassuit aserorneqarput, inuit arlallit ajoquserput. Inuillu sisamat suli maqaasineqartut politiit nalunaarutigaat.

Nuugaatsiarmiunut sapaatiummat tapersiiniartorpassuupput. Nuummi atisanik, kaminnik pingussanillu katersuisoqarpoq. Tapersiiniarlutik aggiussisut amerlangaarmata naammatsittut sapaammi unnukkut nalunaaruteqartoqarpoq. Aggiunneqartulli immikkoorternissaannut poortornissaannullu ikiuukkusuttut suli pisariaqartinneqartut katersuinermik aaqqissuussisut Facebookikkut allapput.

Kalaallit Røde Korsiat arfininngornermi tassaartoqarneranik eqqugaasunut tapersiillutik ataqatigiissaarnermut ikiuullutik Facebookiminni allapput. Islandimi Røde Korsi, Dansk Røde Korsi nunatsinnilu suliniaqatigiiffiit allat nunatsinni Røde Korsimut ikiuunnissaminnik neqerooruteqarput. Kalaallit Røde Korsianut aningaasatigut allatigulluunniit pisariaqartinneqartunik ikiuunnissaq neqeroorutigineqarpoq.

Grønlandsbankip ilaqutariinnut eqqugaasunut aningaasatigut ikiorsiissuteqarfiusinnaasoq pilersippaa. Royal Arctic Linep nunatsinni illoqarfinni containerit atisanik allanilluunniit ilaqutariinnut eqqugaasunut ikiorsiissutaasinnaasunut atorneqarsinnaasut akeqanngitsumik atugassanngortippai.

Aalisakkerivik Sigguk Nuummiittoq, 100.000 koruuninik tapersiissuteqarniarluni nalunaaruteqartoq Sermitsiaq.AG allappoq.

Qaqortumiit Seekon Radio aningaasanik tapersiissuteqarniarluni aamma nalunaaruteqarpoq. Radio 20.000 koruuninik sukkanerpaamik eqqugaasunut nassiunneqartussanik tapersiiniartoq, radiomik piginnittut, Kent Kielsen Hans-Peter N Bayilu tusagassiutinut emailikkut allapput.

Eqqumiitsuliortoq Gukki Nuka, Uummannami peroriartorsimasoq suliaminik nutaanik akitsorterussiniarluni aalajangersimavoq. Aningaasat isertitani Nuugaatsiarmiunut eqqugaasunut tunissutiginiarlugit Facebookimi quppernermini allappoq. Akitsorterussineq marlunngornerup tungaanut ingerlassaaq.

AAMMA ATUARUK Nuugaatsiami innuttaasut maanna nalunaarsorneqarsimalerput

Nuummi innuttaasut arfininngornermi tassaarneranit eqqugaasunut misiginneqatiginninnertik sapaammi unnukkut takutippaat. Inuit hunnorujunit amerlanerusut illoqarfiup qeqqani naapipput, tassani minutsi ataaseq nipangersimasoqarpoq, oqalugiartoqarpoq Nuugaatsiarmiunullu tussiaqatigiittoqarluni. Arfininngornermi alianangaartumik pisoqarneranit inuit sisamat suli maqaasineqarput.

 

 

 

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!