Tasiilami meeqqat affaat atugarliortuupput
Tamanna kommunip tusagassiuutinut nalunaarutaani atuarneqarsinaavoq, tassani nalunaarutigineqarluni kommuneqarfik Sermersooq aamma Namminersorlutik Oqartussat suleqatigiinnissamik nutaamik aallartitsisimallutik, Tasiilami inuuniarnikkut ajornartorsiutit nutaamik aaqqiissutissarsiorfiginissaannut suleqatigiilernermik taaguteqartumik.
Ajornartorsiutip annertussusia pissutigalugu suleqatigiissitami ilaasortat isumaqatigiissutigaat, nutaamik eqqarsartoqartariaqalersoq, tusagassiuutinut nalunaarummi taama allassimavoq.
Ajornartorsiummik aaqqiiniarluni nalinginnaasumik iliuuseqartarneq malissagaanni meeqqat atugarliuuteqartut angerlarsimaffiup avataanut inissinneqassapput. Manna tikillugu taamaaliortarpugut angusalli pitsaavallaarsimanngillat Kommuneqarfik Sermersuumi Meeqqanut, Ilaqutariinnut Atuarfeqarnermullu Ingerlatsivimmi pisortaq, Søren Valbak oqarpoq.
Taassuma takorloorpaa, Tasiilami ilaqutariit ilungersunartumik inissisimasut, katsorsarneqarnissaannik neqeroorfigineqassasut, ilaqutariinnut katsorsaavik Nuummi pilersinneqaqqammersoq atorlugu.
Neqeroorutut sutigut tamatigut sammivilimmik tassani ikiorneqassapput. Assersuutigalugu ilinniakkerinermik, atornerluisuunermut katsorsartinnermik, ilaqutariittut katsorsartinnermik ullaakkullu makissinnaanermik.
Sulisussanilli pisarineqartinneqartunik Tasiilami pissarsiniartarneq ajornakusoortoq, Søren Valbak nalunaarpoq,
Kommuneqarfik Sermersooq Tasiilami tarnip pissusaanik immikkut ilisimasalinnik marlunnik pissarsioqqammeraluarpoq, ataatsimilluunniilli qinnuteqartoqanngitsoq Kommuneqarfik Sermersooq tusagassiuutinut nalunaaruteqarluni taama allappoq.
