Tasiilami inuusuttut kulturikkut illorsuartaalersut
Inuusuttut Tasiilami kulturikkut illussaat nutaarluinnarmik pilersaarusiugaasoq suliniummik ineriartortitsisimasut ilaat tusagassiuutinut nalunaaruteqarpoq.
Danskit aningaasaateqarfiata Lokale og Anlægsfondenip ukiup aappaa avilllugu meeqqat inuusuttullu Tasiilameersut peqatigalugit "inooqatigiinnikkut-kulturikkullu allannguinissaq" siunertaralugu suliniuteqarsimapput atsersimallugu "Siunissaq uagut pigaarput!" Suliniut Kommuneqarfik Sermersooq peqatigalugu sanaartugassanillu ilusilersuisartoq Sophus Søbye Danmarkimeersoq peqatigalugu ilusilersorneqarsimavoq.
Lokale og Anlægsfonden 1994-imi pilersinneqartoq 140 millioner koruuninik nammineq aningaasaateqarpoq, taakku Danamarks Idræts-Forbundip, Danske Gymnastik- og Idrætsforeninger, Dansk Firmaidrætsforbund aamma Dansk Ungdom Fællesrådimit aningaasaliissutaapput. Aningaasaateqarfiuttaaq ukiut tamaasa 80 millioner koruunit Danske spillip agguaatangaaneerlutik.
Inuusuttut kulturikkut illussaat 2019-imi naammassippat takorluugaavoq nipilersortunik, qittappaluttunik, issittormiut pinnguaataannik pinnguartunik, isiginnaartitsisunik, erinarsortunik oqaluttuaqattaattunillu niperpalaartarumaartoq. Inuusuttut aamma suleqatigiillutik silami eqqumiitsuliornermik, filmiliornermik pissanganartorliornermillu ilinniartinneqartassapput.
Inuusuttut illussaat 181 kvadratmeterisut angissuseqassaaq, 100 kvadratmeterisullu angitigisumik Tasiilap umiarsualivianut kangerlummullu isikkivilimmik aneerasaartarfeqassalluni.
Inini allerni ilaatigut kiassagaasussamik sannaveqassaaq, nipilersornermut sungiusaaveqassalluni, immikkullu nipilersukkanut immiussanut nipigissaaveqassalluni. Inimi isersimaartarfeqassaaq, caféqarluni, qitittarfeqarluni sammisaqartitsiveqarlunilu.
Inuusuttut kulturikkut illussaat katillugit 6 millioner koruuninik akeqassaaq. Taakku affaat tre millioner koruunit danskit aningaasaateqarfiata Lokale og Anlægsfondenip akilissuai. Sinneri tre millioner koruunit Kommuneqarfik Sermersuup akilissagai, aningaasaateqarfiit allat sammisassaqartitsinermut tunngasut isumagisassagaat Julie Lynge Kommuneqarfik Sermersuumi immikkoortortami pisortaq nalunaarpoq.
