Tasiilami inissianik qulinik sanaartorneq Sermersuup inaarsarnialeraa

Sanaartorneq 2015-imi oktobarimi unitsinneqaraluarpoq, Tasiilami suliffeqarfik sanaartugassanik suliassinneqartartutuaq Viking Greenland taamanikkut akiliisinnaajunnaarmat.

Ulluunerani paaqqinnittarfik inissiallu qulit sanaartorneqarnerat taamanikkut unitsiinnarneqarnerannik kinguneqarpoq. Kommuneqarfik Sermersuup suliffeqarfik akiliisinnaajunnaartutut nalunaarutigineqartoq taamanikkut aqutarilerpaa, sanaartukkallu taamaaliornikkut aamma akisussaaffigilerlugit.

- Sanaartukkat unitsikkallarnerat sivisuallaannginniassammat, Immikkut illuinnartumik iliuuseqarpugut, Kommuneqarfik Sermersuumi Sanarfinermut Avatangiisinullu Ingerlatsivimmi pisortaq Mike Jakob Kristiansen, kommuni suliffeqarfimmik akiliisinnaajunnaartumik pisimmat KNR-imut decembarimi 2015-imi oqarpoq.

AAMMA ATUARUK Sermersooq: Akiliisinnaajunnaartumik pisineq immikkut iliuuseqarneruvoq

Sanaartugassanik suliassinneqartartoq alla Kommuneqarfik Sermersuumit ukioq ataaseq qaangiummat isumaqatigiissusiorfigineqarpoq, Tasiilami sanaartukkat naammassineqarsinnaanissaat siunertaalluni.

Taamatulli aaqqiisoqarnera kommunimut akisusimavoq.

Inissiat qulit sanaartorneqarnerisa 25 millionit koruuninik akeqarnissaa aallaqqaammut siunniunneqarpoq, Viking Greenlandilli akiliisinnaajunnaarneratigut kommunip aningaasartuutai 8 millionit koruuninik ilaneqarput.

- Sanaartukkat naammassinissaat eqqarsaatigalugu aningaasartuutaasussatut siunniunneqartut iluanni matussuserneqarsinnaanngillat. Sanaartugassanik suliassinneqartartup akiliisinnaajunnaarnera matumani pissutaavoq. Ilassutissatut aningaasaliissutissat 8 millionit koruunit qinnutigineqarput. Kommunalbestyrelsip ataatsimiinnissaanut ullormut oqaluuserisassat allattorsimaffianni taama allassimavoq.

Inissiat qulit aappaagu marsimi naammassineqarsimanissaat naatsorsuutigineqarpoq.

AAMMA ATUARUK Viking Greenland-konkurs dyr for skatteborgerne