Tasersuup Atuarfia matugallarpoq

Qaqortumi Tasersuup Atuarfiani atuartitsineq una sapaatip akunnera unitsikkallarneqarpoq, atuarfillu matoqqassasoq nalunaarutigineqarluni.
Assi © : Jaaku Lyberth/KNR
Allattoq Mads Lynge
novembarip 12-at 2015 16:58

Qaqortumi Tasersuup Atuarfiani sulisuusimasup tarnimigut qasusooqqasup kingorna toqqissiviilliortoqarnera pissutaalluni Tasersuup Atuarfiani atuartitsinerup tamaat ullumi sisamanngornermi unitsikkallarneqarpoq, atuarfiullu aqagu tallimanngornermi matoqqanissaa nalunaarutigineqarluni. Kommune Kujallermi Meeqqanut Kulturimullu Ingerlatsiviup kaammattuuteqarneratigut tamanna pivoq.

- Suliaq pineqartoq atuarfiup ingerlaneranut sunniuteqarsinnaanersoq ilisimaneqanngilaq, taammaammat atuarfimmi ingerlatsinikkut pisortaata, atuarfiup pisortaata, aammattaaq borgmesterip allaffiata isumasioqatigiinnerisa kingorna nalilerneqarpoq pissutsit toqqissisimarnartunngornissaasa tungaannut maannakkumuugallaq atuarfiup atuartitsinera unitsikkallarneqassasoq, Kommune Kujalleq taama ilaatigut allaaserisaqarpoq.

Kommunillu borgmesteria Jørgen Wæver Johansen nassuiaavoq:

- Meeqqat sutigut tamatigut toqqissisimatinneqarnissaat pillugu taama aalajangertoqarpoq, Jørgen Wæver Johansen oqarpoq.

Suliaq borgmesterimit atorfilittaanillu malinnaavigineqarpoq, suliallu naammassilluarneqarnissaa pillugu suligasuartoqarpoq, pineqartunullu sapinngisamik ajoqusersuutaanngitsumik ingerlasoqarnissaa sulissutigineqarluni.

Jørgen Wæver Johansenip erseqqissaatigaa sulisuusimasoq maanna katsorsarneqaleruttortoq, taamaattorli atuartitsinerup unitsikkallartariaqarnissaa pisariaqarsimasoq. Taassuma suli oqaatigisinnaannginnerarpaa Tasersuup Atuarfia ataasinngorpat aamma matoqqassanersoq.