Tarnikkut nappaatillit ulluat
Tasiilami ataasinngorpat malunnartinniarneqassaaq. Kommuneqarfik Sermersuup nittartagaani tamanna atuarneqarsinnaavoq.
Tarnikkut nappaatillit pillugit ulloqartitsinermi naapisimaaqatigiittoqassaaq, tarnikkullu nappaatit suunersut oqaluttuarineqassapput, kiisalu inuiaqatigiinnit akuerineqarnissap ammasumillu pissuseqarfigineqarnissap pisariaqartinneqarnera eqqartorneqassalluni.
Tarnikkut nappaatillit ulluat Nuummi katersortarfimmi malunnartinniarneqassaaq, tassa nalunaaqutaq ataatsiniit tassuugu sisamat tungaannut aaqqissuussamik malunnartinniarneqassalluni.
Paasissutissiivinnik ilioraasoqassaaq, kaffeqarlunilu teeqassaaq, assassukkanillu aamma tuniniaasoqassalluni.
Borgmesteri Asii Chemnitz Narup oqalugiassaaq, soorlu aamma peqqissutsimut naalakkersuisoq Agathe Fontain oqalugiassasoq. Ullup ingerlanerani aamma aliikkusersuisoqarumaarpoq.
Paamiuni aamma taamatut malunnartitsiniaasoqassaaq, Klara Petersenilu tarnikkut nappaatillit pillugit peqqinnissaqarfimmi immikkoortortaqarfimmeersoq oqalugiassalluni.
Tasiilami ataasinngorpat apriilip ulluisa aappaanni malunnartitsiniaasoqassaaq, nalunaaqutaq ulloqeqqaniit sisamat tungaannut.
Tamanna Tasiilap katersortarfiani pissaaq, nereqatigiittoqassaaq, aliikkusersuisoqassalluni nipilersortoqarlunilu qittattoqassalluni.