Tapiissutit ikilinissaat ICC-p iluarisimaarpaa
Namminersorlutik Oqartussat ICC-mut tapiissutaat ukioq manna 400.000 koruuniinik ikilineqassapput. Tapiissutillu ukiuni tulliuttuni ikiliartussapput. Taamaattoq ICC-p Kalaallit Nunaanni immikkoortortaqarfiani siulittaasoq Hjalmar Dahl iluarisimaarinnippoq.
Allattoq Ivik Kristiansen
novembarip 24-at 2015 16:56
Aningaasanummi inatsisissatut siunnersuut siullermeerluni saqqummiunneqarmat tapiissutit 1 millionit koruuninik ikilineqarnissaat pilersaarutaagaluarpoq, tapiissutillu ukiuni tulliuttuni ikilineqartussaagaluartut pilersaarutaasumit aamma ikinnerupput.
- Taamatut aalajangiineq ICC-mi ingerlatsinitsinnut toqqissiallannaqaaq, eqqissillutami siunissami suliassavut pilersaarusiorsinnaalissavagut, Hjalmar Dahl oqarpoq.
ICC-mut tapiissutigineqartartut ukiuni kingullerni ikilineqangaatsiarput. Tapiissutinilli ikilisaaneq Inatsisartunit unikaallatinneqarnera, ICC-p politikerinit tatigineqaqqilersimaneranut ersiutaasorineqarpoq. Aammalu nunat tamalaat akornanni ICC-p suliaasa pingaaruteqarneranik takutitsisuusoq, Hjalmar Dahl isumaqarpoq.
