Vittus: Tapersersorneqarluarpunga

Vittus Qujaukitsup Siumup Nuummi immikkoortortaqarfiani siulittaasunngornera, Kim Kielsenip siulittaasutut taarserniarnissaanut Naalakkersuisuni ilaasortaasimasumut pingaaruteqarluinnarpoq. Siulittaasunngortoq nammineq taama oqarpoq.

- Taamaalillunga Siumup aasaru ataatsimeersuarnerani oqaaseqarsinnaatitaallungalu taasisinnaatitaalerpunga, Qujaukitsoq taama oqarpoq.

Tamatumunngalu peqatigitillugu maanna siulittaasoq unammillerlugu siulittaasussatut sassarniarluni aalajangersimallugu naqissuserpaa. Taakku marluk, apeqqutit angisuut, soorlu nunatta nammiliivinnissaa Danmarkimullu USA-mullu qanoq pissuseqarnissaq isumaqatigiinngissutigisaraat ilisimaneqareerpoq.

AAMMA ATUARUK Vittus akerliugami naalakkersuisuujunnaartoq

Vittus Qujaukitsoq sukanganiarnerulluni nipituuliortuusarpoq, Kielsenilu eqqissisimanerusumik pissuseqarniartuulluni.

Qujaukitsoq nunanut allanut naalakkersuisutut Kim Kielsenimit tunuartinniarneqarnini pissutigalugu naalakkersuisunit apriilip qaammataani ilaasortaajunnaarpoq. Inuussutissarsiornermut, niuernermut nukissiuuteqarnermullu naalakkersuuffiit pigiinnarnissaanik Kielsenimit neqeroorfigineqaraluarpoq, Qujaukitsorlu tamatumunnga qujaannarpoq. Ullorlu taanna nalunaarutigaa siulittaasumi unammillernissaanut piareersimalluni. 

Siumullu immikkoortortaqarfiisa anginersaanni, Siumut Nuummi, siulittaasunngortinneqarnermigut siulittaasunngorniunnissami alloriaqqippoq.

- Sinerissamit tamarmit tapersersorneqarluarpunga, taamaattoqarneralu iluarisimaarpara, Qujaukitsoq taama oqarpoq.

AAMMA ATUARUK Vittus Qujaukitsoq Siumut Nuummi siulittaasunngortoq