Tanbreezimut isumaqatiginninniarnerit unittooqqasut Wæverip utaqqisinnaajunnaarai

Namminersorlutik Oqartussat Australiamiullu suliffeqarfiata Tanbreezip akornanni isumaqatiginninniarnerit unittooqqasut, Kommune Kujallermi borgmesterip Jørgen Wæver Johansenip utaqqisinnaajunnaarpai.
februaarip 11-at 2016 05:31

Isumaqatiginninniarnerit nutaanik inuttalerlugit aallarteqqinneqanngikkunik, isumaqatiginninniarnerit unitsivinneqartariaqartut taanna isumaqarpoq. Sermitsiami sapaatip-akunnerata siuliani saqqummersumi tamanna allaaserineqarpoq.

- Isumaqatigiinniarnerit kukkusimanerat takuneqarsinnaavoq. Taamaattumik illuatungeriit tamarmik nutaanik isumaqatigiinniarnerni siuttoqalernissaat aaqqiissutaasinnaavoq, Jørgen Wæver Johansen oqarpoq, isumaqatigiinniaqqittoqalissappallu kommunip allaffeqarfiata ilaani isumaqatigiinniartoqarsinnaanissaa ammaffigalugu.

Tanbreezillu Jørgen Wæver Johansenip siunnersuutaa piareersimaffigaa, isumaqatigiinniartoqarsinnaalernissaanik nassataqassappat:

- Tanbreezip tungaanit suliaq ingerlaqqilersinnaaqqullugu pisariaqartunik iliuuseqarnissamut piareersimavugut, Tanbreezip oqaaseqartitaa Kuupik V. Kleist AG-mut oqarpoq.

Isumaqatigiinniarnerit nutaanik inuttalerlugit aallarteqqinneqarsinnaanissaannut Kommune Kujalliup borgmetseriata siunnersuutaa Namminersorlutik Oqartussat isumaqatiginngilaat. Isumaqatigiinniarnernik isumaginnittut sapinngisamik pitsaanerpaamik iliuuseqarsimapput, Namminersorlutik Oqartussat oqarput.

Tanbreezip piiaanissamut qinnuteqaammut atatillugu, ingerlatseqatigiiffiup inatsisitigut pisussaaffittut inuiaqatigiinni piujuartitsinissaq pillugu nalilersuineri, VSB-mik taaneqartartut avatangiisinullu sunniutaasussanik nalilersuineri, VVM-imik taaneqartartut, naammaginarsimanngitsut Namminersorlutik Oqartussat isumaqarput.