Tammajuitsussanik piniartitsinermi ilisimasortanngortut 14-it
Inuit 14-it umimmannik tuttunillu tammajuitsussanik piniartitsinermi ilisimasortassatut allagartartaarput. Namminersorlutik Oqartussat nittartakkaminni taama paasissutissiipput.
Tammajuitsussanik piniartitsinermi ilisimasortatut pikkorissaaneq Campus Kujallermit, Aalisarnermut Piniarnermullu Naalakkersuisoqarfik suleqatigalugu aaqqissuunneqartoq, Kangerlussuarmi novembarip qaammataani ingerlanneqarpoq.
Inuit 14-it nunatsinni sumiiffinnit assigiinngitsuneersut pikkorissarnermut peqataapput tamarmillu angusillutik. Ajoraluartumilli Nanortalimmiut peqataasussat marluk silap ajornera pissutigalugu Kangerlussuarmut apuutinngitsoorput.
Allagartartaartut taamaalillutik umimmannik tuttunillu tammajuitsussanik piniartitsinermi ilisimasortatut aallartinnissamut, umimmannilluunniit tuttunillu tammajuitsussanik piniartitsinermik ingerlatsissussatut qinnuteqarnissaminnut periarfissaqalerput.
