Red Barnet Tamataqanngitsunik assilisanik siammarterisoqarnera qaangeruminaappoq

Arnat tamataqaratik assiminnik akuerseqqaaratik nittartakkamut ikkussuisoqarsimaneranik eqqugaasut inuunerminni ingerlariaqqinnissaminnut tarnip pissusaanik ilisimasalinnit ikiorneqartariaqarsinnaapput. Red Barnet Danmarkimi siunnersorti taama oqarpoq.
Assi © : Red Barnet
decembarip 05-at 2016 13:00
Nutserisoq Bibi Nathansen

Arnat tamataqaratik assiminnik akuerseqqaaratik nittartakkamut ikkussuisoqarsimaneranik eqqugaasut inuunerminni ingerlariaqqinnissaminnut tarnip pissusaanik ilisimasalinnit ikiorneqartariaqarsinnaapput. Red Barnet Danmarkimi siunnersorti taama oqarpoq.

Arnammi tatigisinnaanasorisaminnut sumiginnagaanermik annertuumik misigisaqartarput.

- Inoqatiminnik tatiginnileqqinnissaminnut ikiorserneqartariaqarsinnaapput, Red Barnet Danmarkimi meeqqanik illersuinermi siunnersorti Gitte Jakobsen oqarpoq.

Taanna naapertorlugu ikiorserneqarneq ilaquttanit ikinngutinilluunniit pisinnaavoq, allatulli ajornassappat tarnip pissusaanik ilisimasalimmik oqaloqateqarnissaq pisariaqarsinnaalluni.

Arnat kalaallit tamataqanngitsut assinginik akuersiteqqaarnagit pornomik nittartakkami ikkussuisoqarsimanera KNR-imit sisamanngormat qulaajarneqarpoq.

Nunatsinni sakkortunerusoq

Inuiaqatigiinni amerlanngitsuni, Nunatsinni, arnat ilisarineqarnissaminnut qaninnerusarput, taamaalillunilu misigisaminnik qaangiinissaat ajornarnerusarluni.

- Kikkunnit tamanit takuneqarsinnaasumik saqqummiussisoqarnera kanngunartutut misiginarsinnaavoq, soorlu naqissusigaasimasutut misinnarsinnaalluni. Kanngusunnerup taassuma suliarinissaanut ikiorneqarnissaq pisariaqarsinnaavoq, Gitte Jakobsen taama oqarpoq, erseqqissaatigaalu arnat saqqummiunneqartut tassaammata taakku atornerlunneqarsimasut pinerluttuliorfigineqarsimasullu.

Taamaammat kanngusunneq pisuusutullu misigineq qaangiussagunikkit misigisartik pillugu oqaloqateqarnissaat pisariaqarluinnarpoq.

- Kanngusunneq taanna oqaluuserineqartariaqarpoq, assillu peerniarnissaanik ikiorsorneqartariaqarluni, naak qulakkeerneqarsinnaanngikkaluartoq. Tatiginninnermik pakatsisinneqarneq, kanngunneq, pisuusutullu misigineq aamma oqaluuserineqartariaqarput, misigisarmi imaaliallaannaq qaangerneqarsinnaanngilaq,  

Gitte Jakobsen KNR-imut taama oqarpoq.