Tamarmik aalisarneq oqaluuseraat - Karl Kristian Kruse piniariarsimavoq
Inuussutissarsiutit pingaarnersaat, aalisarneq, nunatsinni maannakkorpiaq oqallisigineqaqaaq.
Qeqertarsuup Tunuani ukioq manna qaleralittat siornamut sanilliullugit ikileriarujussuarput, aningaasarsiornikkut kingunerluutaaqisumik.
Naalakkersuisut akuersaagaannik ukiuni arlalinni aalisapiluttoqartoq, isornartorsiuisut ilaat oqarput.
Aalisarnermut inatsisissatut siunnersuut Naalakkersuisut nittartagartik aqqutigalugu ataasinngornermiit tusarniaassutigaat.
Inatsit ukiuni arlalinni utaqqisaavoq, saqqummiunneqanngitsorlu SIK-p, GE -p KNAPK-llu isornartorsiulereerpaat.
KNR-ip aalisarnermut naalakkersuisoq, Karl Kristian Kruse, tallimanngormalli apersorniaraluarpaa, Karl Kristian Kruseli piniariarsimasoq allattoqarfiata akissutigiuarpaa.
Apeqqutit utaqqisut
Tassalu nunatsinni inuussutissarsiortut pingaarnersaannut naalakkersuisumut apeqqutissarpassuagut utaqqiinnarput. Aamakkua ilaannaat:
- Aalisarneq pillugu inatsit nutaaq nunatta karsianut 130 millionit koruuninik naleqarsinnaavoq. Sooq taamaakkaluartoq inatsisissaq pitsaava?
- Millionerpassuit siunnersuut piviusunngorpat Nunatta Karsiata annaasassai sumiit taartissaqarpat?
- Naalakkersuisoqatigiit namminiilivinnissaq sulissutiginiarlugu siunertaraat. Siunnersuutip uuma imminut nappattumik aningaasarsiulernissarput ungasillisissavaa. Suna pingaarnerua? Aalisartut amerlanerit namminiilivinnissarluunniit?
- Siunnersuut amerlanerusunik suliffissaqartitsilissanngilaq, suliffiit allamiit allamut nuuinnassapput. Sooruna siunnersuutersi pitsaagigissi, uffalu aamma nunatsinnut alisarnermullu ajoqutaassasoq allallusi?
Karl Kristian Krusep saniatigut KNR-ip aamma naalakkersuisut siulittaasuat, Kim Kielsen, aningaasaqarnermullu naalakkersuisoq, Aqqaluaq B. Egede siunnersuut pillugu apersorusukkaluarpai. Taakkuali Karl Kristian Krusemut, piniariarsimasumut, innersuussipput.
Nalunaaqutaq 15.50 nutarterneqarpoq: Karl Kristian Kruse sisamanngornermi nalunaaqutaq marlunut tusagassiortunik katersortitsiniarpoq, tassani aalisarnermut inatsisissatut siunnersuut, ullut pingasut matuma siorna tusarniaassutigineqalereersoq saqqummiunniarpaa.
