Tallimat cannabissimik nakorsaateqarnissamut akuerineqareertut
- Maannamut misilittagarineqartut pitsaasupilussuupput, Assia Brandrup-Lukanow taama oqarpoq.
Cannabissimik nakorsaasersuineq matumani pineqarpoq, taamatullu nakorsaasersuinerup ukioq manna siusinnerusukkut akuersissutigineqarnerata kingorna kræftimik nappaateqarlutik peruluttut tallimat maannamut cannabissimik nakorsaatinik tunineqarsimapput.
AAMMA ATUARUK Cannabis nakorsaatitut atorneqalernissaa akuersissutigineqarpoq
Nakorsatut qullersap ilisimatitsissutigaa nakorsaat napparsimasut ataasiakkaarlugit naliliiffigineqarnerisigut aatsaat tunniunneqarsinnaasoq. Cannabissimik nakorsaat maannamuugallartoq kræftimik nappaateqarlutik peruluttunuinnaq tunniunneqarsimavoq.
Nakorsaatit allat orniginartinnerugaat
Assia Brandrup-Lukanowip oqaatigaa cannabissip nakorsaatitut atorneqarnera suli ilisimasaqarfigineqarpallaanngitsoq, taamaattumillu nakorsat nakorsaatit ilisimaneqarnerusut atoqqaartaraat.
- Cannabissimik nakorsaatit pissarsiarineqarsinnaasut suli nutaajupput, aamma maannamut misilittagaqarfigineqarpallaanngillat. Taamaammat aallaqqaasiutitut nakorsaatit katsorsaanerillu ilisimasagut atussallugit orniginartinneruarput.
Assia Brandrup-Lukanowip ilisimatitsissutigaa cannabissimik nakorsaatit atorlugit katsorsaaneq ikiuiniarluni katsorsaanerusoq. Assersuutigalugu kemoterapeertinnermi imaluunniit morfini atorlugu anniarnaveersaatitut katsorsartinnermi nipaallisaatitut merianngunaveersaatitullu atorneqartarpoq.
Cannabissip nakorsaatitut piffissami sivisunerusumi atorneqarnerata saniatigut sunniutigisinnaasai ilaatigut tassaasinnaapput eqqarsarluarsinnaajunnaarneq, periataarsinnaajunnaarneq, siniuerneq uummammillu kassutsitsineq. Assia Brandrup-Lukanow naapertorlugu napparsimasut amerlanersaat saniatigut sunniutinik sakkortuunik atugaqarneq-ajorput, saniatigulli sunniutaasartut nakorsaatip sivisuumik atornerani ikiliartortartut. Nakorsatulli qullersap erseqqissaatigaa napparsimasut tallimaannaat taamatut nakorsaasersorneqarsimammata inerniliinissamut suli siusippallaartoq.
Nappaatitut allanut nakorsaataalersinnaasoq
Cannabissip nappaatinik allanik katsorsaanermut, soorlu assersuutigalugu sklerosemik nappaateqartunut siunissami atorneqarsinnaaneranik aperineqarami nakorsatut qullersaq akivoq kræftimik nappaateqartut saniatigut allanik nappaateqartut cannabissimik nakorsaasersorneqarsinnaanissaat takorloorsinnaallugu. Assersuutigalugu sklerosemik nappaateqartut. Taamaaliortoqassappalli nakorsaq immikkut paasisimasalik nalilersueqqaassaaq nakorsaatissamillu innersuussilluni, aamma nakorsaatit pillugit ataatsimiititaliamit, peqqinnissaqarfimmi nakorsat nakorsaatinik qanoq ittunik innersuussisinnaanerinik akuersisartumit akuersissutigineqartussaavoq.
- Taamaammat nakorsat immikkut paasisimasallit akornanni cannabissimik nakorsaatit toqqarnissaannut pissutissaqarnersoq oqaluuserineqassaaq. Taava tamanna akuersissutigineqassanersoq nakorsaatit pillugit ataatsimiititaliami naliliiffigineqassaaq, Peqqinnissaqarfimmi nakorsatut qullersaq, Assia Brandrup-Lukanow, taama oqarpoq.
Taassuma aamma ilisimatitsissutigaa cannabissimik nakorsaatit napparsimasunut innersuunneqartut Nakorsaatit pillugit ataatsimiititaliamit ingerlaavartumik naliliiffigineqartartut.
