Talermittaattartut Sverigimi unammillertut
Talermittaattartut Nunatsinneersut tallimat Golden Arm 2017 Sverigimi arfininngorpat februaarip 25-ani pisussami unammeqataassasut Nanoq Pullers tusagassiuutinut allappoq.
Talermittaattartoq Minik Sune Trondheim Johansen 95 kiilut sinnerlugit oqimaassusilinni ukioq kingulleq talerpimmik saamimmillu guultinnappoq, taamaammallu ukioq manna akissarsiutigalugu talermmittartunut unammissaaq.
Akissarsiutigalugu unammisartunut Minik unammilluni misilinnikuuaa, taamaammat naapitassani qanoq ittuusut ilisimalluarpai.
- Qanoq issanersoq takujumaarparput. Taakku mattunerujussuupput. Taamaattorli sungiusarluarnnikuuvugut. Neriuppunga medaljannassinnaassallunga, Minik Sune Trondheim Johansen KNR-imut oqarpoq.
Taanna talermittartoqatini Jan Mikael Heilmann, Malik Motzfeldt, Mikkel Andersen aamma Suulut Geisler peqatigalugit Eskilstunamut Sverigimiittumut unammigiassapput.
Golden Arm 2017-imi nunat qulit missaanniittut sinnerllugit talermittaattartut 130-it missaanniittut oqimaassutsini assigiinngitsuni unammeqataassapput.
