Takornartat oqaasii siunissamik aaliangiisuupput

Sineriammi meeqqat atuarfiini soraarummeernermi angusinngitsoortorpassuit ikilisissagaanni, oqaatsit pillugit eqqarsarneq kalaallini allanngortariaqalersoq, Ilinniartitaanermut Naalakkersuisoq, Nivi Olsen, isumaqarpoq.
marsip 16-at 2015 13:45

Meeqqat atuarfianni meeqqat angajulliit, allattariarsornermi oqaluttariarsornermilu, qallunaatut tuluttullu soraarummeernerminni, atuartut affaat angusinngitsoortartut misissuinerit kingulliit takutippaat, aviisip Sermitsiap tallimanngormat saqqumersitaani allaqqavoq.

Atuarfeqarfiup tassunga killinnera ajuusaarnartoq, kalaallillu nutaamik eqqarsartariaaseqatariaqalersut, Ilinniartitaanermut Naalakkersuisup, Nivi Olsenip, KNR-imut oqaatigaa. 

- Ajuusaarnartorujussuuvoq inuiaqatigiinni tassunga killinnerput, qallunaatut tuluttullu piginnaasat appasitsillugit, ilinniarfeqarfinni assigiinngitsuni matut amerlasuut matusarmata, Nivi Olsen taama oqarpoq.

Naalakkersuisup erseqqissaatigaa ilinniarfeqarfiit assigiinngitsut amerlammata, taamaammat ilinniaqqinnissamut periarfissat tamarmik matunngitsut.

Tassunga ilanngullugu oqaatigaa, meeqqat oqaatsinik ilinniarnissaannut ajornartorsiut annerpaat ilagigaat, angajoqqaat inuiaqatigiillu oqaatsit allat sakkussatut isiginngimmatigit.

- Inuiaqatigiit angajoqqaallu akornanni paasisariaqarparput oqaatsigut kulturiinnanngimmata, oqaatsit allat sakkussatut isigalugit meeqqagut tapersersortariaqaratsigit, qallunaatut tuluttullu ilikkarnissaat qanoq pingaaruteqartiginersoq ersarissarlugu, namminerlu aamma paasillugu, Ilinniartitaanermut Naalakkersuisoq taama oqarpoq.

 

Atuarfitsialak

Nivi Olsen isumaqarpoq, Atuarfitsialaap immini isumaa ajunngilluinnartoq, piviusunngortinnissaali inuiaqatigiinnit unamminartinneqartoq.

- Atuarfitsialaap isumaa imarisaalu kusanartorujuuvoq, nammineerlunga taanna taama oqaatigisariaqarpara, uani equngasoqarnera uaniippoq, ulluinnarni piviusunngortinnissaajuna suli tusiaffigigipput, Ilinniartitaanermut Naalakkersuisoq, Nivi Olsen, KNR-mut oqarpoq.