UNESCO Takornariaqarnermut iluaqutaassangatikkaat
- Quttaserpunga pississaajutingalunga nilliaatingalunga, takornariat angallatitsinnut ikaarteruttorlugit. Aquttorisatsinnut aamma suaarpunga UNESCO-mut akuerisaanerarluta, Greenland Sagalandimi pisortaq Pitsi Høegh oqarpoq.
Kujataani sumiiffiit tallimaasut nunat eriagisassat allattorsimaffianniilissanersut Kommuni Kujallermi pissanngatigisimavaat.
Takornariaqarnermullu siuarsaataanissaa naatsorsuutigaat.
- Qularnanngilaq takornariaqarnerup iluani annertuumik kinguneqarumaartoq. Tassa nunarsuarmi eriagineqartut allattorsimaffianiileratta eqqumaffigineqarnerulissuugut, Kommune kujalliup borgmesteria Kiista P. Isaksen taama oqarpoq.
Pitsi Høeghip kujataani takornariat amerleriaateqassasut naatsorsuutigaa.
- Takornariat suut eriagisassaanersut ujartortarpaat. Suut immikkut nalunaarsorneqarsimappat? Soorlu uagut aamma taamaattarpugut, suut tusaamaneqarnersut takorusullugit ujartortarpagut, Pitsi Høegh oqarpoq.
