Takornariaq qallunaajugunartoq Savalimmiuni innakkut nakkartoq

Takornariaq svenskeq ajunaarpoq, takornariarlu angut qallunaajussagunartoq innakkut 10 miiterisut portutigisumit pingasunngornermi nakkarsimasoq maanna napparsimmavimmiilluni.
Assi © : Rigspolitiet
Allattoq Ritzau
juulip 06-at 2017 10:28
Nutserisoq Bikki P. Kleist

Angut svenskeq ajunaarsimavoq, angullu Danmarkimi najugaqartoq napparsimmavimmiilluni. 
Takornariat qaqqasiorlutik pinngortitamiissimapput, innakkoortillutillu nakkarsimallutik.

Savalimmiuni politiit pigaartuat, Christian Joensen taama nalunaaruteqarpoq.

- Svenskeq 41-nik ukiulik toqukkut unnukkut qimaguppoq. Angalaqataalu innakkut aamma nakkartoq, qallunaagujunartoq 79-nik ukioqarpoq.

- Tamanna suli uppernarsinngilarput. Ullaap tungaani tamanna nalunaallissaaq, Christian Joensen oqarpoq.

Qallunaajussagunartoq maanna ajunngilaq, Joensen aamma oqarpoq. 

AAMMA ATUARUK Takornariaq Italiameersoq Islandimi ajunaartoq

Angutit marluk angalasullu allat peqatigalugit pinngortitami pisuttuarsimapput, angutillu marluk naasunik katersuisimapput.

Innamit nakkartoqareersorlu politiit pingasunngornermi ualikkut nalunaaqutaq 14.30 nalunaarfigineqarput, erngertumillu ambulancet ikiuukkiartortinneqarlutik, politiini pigaartoq taama ilisimatitsivoq.

- Qaqqami sivingalluinnartumi innartaaniissimapput, nakkartup aappaata tutinerliorluni pisoqatini tigoriaraluarsimassagunarpaa, Christian Joensen nassuiaavoq. 

Inuit nakkartut marluk ajoqusingaatsiarsimasut Thorshavnimut napparsimmaviliaanneqarput. Kingornalu 41-nik ukiulik ajoqusernini toqutsigalugu.

Angutip svenskip ilaqutai ilisimatinneqareerput. Nakkartup aappaata 79-nik ukiullip nulia angalaqataasimavoq, taakkualu ilaqutai aamma ilisimatinneqareerlutik.