Takornarianut sullissiviliortoqarnissaa apeqquserneqartoq

Naalakkersuisut siunersuutigaat, takornariaqarnermut sullissiviliortoqassasoq, takornariaqarnikkut sullissivissanik pilersitsoqarpat Namminersorlutik Oqartussanit pigineqassasut, tamannalu kommuninit katersugaasiveqarfinniillu isornartorsiorneqarpoq.

Inatsisissaq pillugu aappassaa tusarniaasoqarmat Qeqqata kommunia, Kommuneqarfik Sermersooq kiisalu katersugaasiviit kattuffianit, NUKAKA-mit siunnersuut ilalerneqanngilaq.

Takornarianut sullissivissanik kommunini sisamaasuni tamani pilersitsiniarneq siunnersuutaavoq.

Aamma atuaruk Qujaukitsoq nuna tamakkerlugu takornariat ornigarfissaannik pilersitserusuppoq

Inatsisissatut siunnersuut piviusunngussappat Nunatta oqaluttuarisaanerata takornarianut saqqummiunneqarnera sullissivinni katersugaasivinnilu pisalissaaq, taamatullu siunnersuuteqarneq NUKAKA-p eqqumiigaa.

Oqaluttuarisaanitsinnimi misigisaqartitsinissaq katersugaasiviit pioreersut ineriartorteqqinnerisigut suleqatiginerisigullu pisariaqaraluartoq, NUKAKA isumaqarpoq.

Katersugaasiviit kattuffiata aamma oqaatigaa, sullissivinnik pilersitsiortortoqaraluarpalluunniit takornariat tikittartut amerlanerulernissaat ilimanaateqanngitsoq.

Kommunit apeqqusiisut

Tarkornarianut sullissiviliortoqarpat katersugaasiveqarfiit qanoq ingerlariaaseqassanersut paasiniarneqartariaqartoq, Qeqqata Kommuniata tusarniaanermut akissummi tikkuarpaa.

Kommuneqarfik Sermersuup sullissiviliortoqarnissaa pissusissamisoorsorinngilaa, kommuunimmi namminersorlutik takornariartitsisartut pisortanit unallilerneqarnissaat aarlerigamikku.

Aamma atuaruk Isfjordscenter nunap sinneranut isumassarsiorfiussaaq