Takornarialerisoq: Ilisimasaqarneq sakkugissallugu nalituujuvoq
Takornarialerinermik siunnersorti, Sarah Woodall, takornarianik 450-inik isumasiuisimasoq, taama oqarpoq:
- Ilisimasaqarneq sakkugissallugu nalituujuvoq. Takornariallu suut pingaartinneruneraat nalunngikkukku, suliniuteqarniarnermut tamanna aallaaviusinnaavoq, Sarah Woodall, Visit Greenlandimeersoq oqarpoq.
Takornariat 450-it sinerissami siorna ukioq mannalu angalanermini, Sarah Woodallip isumasiorsimavai. Nunarput tamakkingajallugu taanna angalasimavoq, soorlu aamma Sarfaq Ittummut ilaalluni sapaatip-akunnera ataaseq angalasimasoq, takornariarpassuillu tassani naapissimallugit.
Anders la Cour Vahl, Visit Greenlandimi pisortap tullia, inunnik kujataani isumasiuisuusimavoq.
Nunatsinni takornariat pillugit sullissinermi 2015-i naatinnagu angusassat, Visit Greenlandip Naalakkersuisut peqatigalugit saqqummiuteqqammerpai:
- Takornariat nutaat pillugit paasissutissat suunersut paaserusuppavut. Periarfissat suut ujartortarneraat paaserusupparput, takornarianut periarfissat taamaasilluta ineriartortissinnaaniassagatsigit, Visit Greenlandip pisortaa Anders Stenbakken Radioavisiimut ippassaq ilaatigut oqarpoq.
Tassalu paasissutissat ineriartortitsinissamut atorneqassapput, takornarianulli paasissutissiinissamut aamma atorneqassallutik, Visit Greenlandip pisortaata tullia Anders la Cour Vahl, oqarpoq:
- Kalaallit Nunaat takornariarfigissallugu suli nutaajuvoq, takornariallu sutigut tamatigut ikorfartorneqarnissaa taamaammat pingaaruteqarpoq. Tassa Nunatsinnukarusulerneraniit, pilersaarusiorneranut, allarluinnarmullu angalanani Nunatsinnukarnissaanut atatillugu takornariap ikiorneqarnissaa taamaammat pingaaruteqarpoq, Anders la Cour Vahl, Visit Greenlandimeersoq, oqarpoq.
Naak Alaska USA-mut ilaagaluartoq, amerikamiut Kalaallit Nunaannukarusussinnaanerannut periarfissat annertuujusut, Sarah Woodallip, USA-meersup qularutiginngilaa:
- Amerikamiut Issittoq eqqarsaatigigaangamikku Alaska eqqaasarpaat. Tassalu Alaska unammillertigaarput. Kisianni Kalaallit Nunaat "Issittumi angisuut tallimat pigai", tassa arferit, siku, arsarnerit, qimusserneq kulturikkullu misigisassat. Issittumilu tikinneqarsinnaasut allat eqqarsaatigalugit tamanna allaanerussutigaarput, atorluarsinnaallutigulu, Sarah Woodall, Visit Greenlandimi siunnersorti, oqarpoq.
Takornarianik isumasiuinermi inernerit nittartakkatigut alakkarterneqarsinnaapput, www.tourismstat.gl alakkarterneqarsinnaalluni.
Paasissutissat Kalaallit Nunaanni Naatsorsueqqissaartarfik suleqatigalugu katersorneqarsimapput.
