Taasitsinerup kingorna partiit eqqartueqqikkusulerput
Inatsisartut ataatsimiittarfissaa Nuutoqqami, ilaatigut Aqqaluup Aneerasaartarfianiittussasut siunnersuutaasoq, taaseqataasut amerlanerpaartaasa isumaqatiginngilaat. Aamma taaseqataasut 58 procentiisa maanna ataatsimiittarfiup atuinnarneqarnissaa siunnersuutigalugu taasillutik.
Inatsisartut ataatsimiittarfissaannik aalajangiinermi, Inatsisartut siorna taasitinneqarneranni Demokraatit kisiartaallutik tamassumunnga isumaqataanngillat.
- Taama aalajanersimanerput innuttaasut kissaataasa malinneqarnissaanik tunngaveqarpoq, ullumilu taasinerup inernerata tamanna takutippaa, tamannalu Demokraatitut tulluusimaarutigaara, Demokraatit siulittaasuat, Anda Uldum oqarpoq.
Inatsisartut ataatsimiittarfissaata sumi inissisimanissaanut piukkunneqartut marluk Nuutoqqamiipput aappaa Aqqaluup Aneerasaartarfianiittussatut siunnersuutaalluni. Taakunani inissinneqarnissaanut isumaqataasut katillutik 6 procentiupput. Alla illorsualiorfiusinnaasoq Arsiffik, taanna blokkit 1-p 10-llu eqqaanniittoq, taasisut 38 procentiisa piukkuppaat.
Kommuneqarfik Sermersuup innuttaasunik taasisitsinerata inerneri tamanut nalunaarutigineqareersoq, Inatsisartuni partiit siuttui tusarniaaffigaagut, taasinerup inerneranut qanoq isumaqarnersut. Taakkulu tamarmik oqaatigaat, soorunami innuttaasut taasinerat ataqqisariaqartoq aamma oqaatigalugu ataatsimiittarfissamik nutaamik sanaartorniarnermi aalajangersimaneq eqqartorneqartariaqartoq.
Inatsisatut nutaamik ataatsimiittarfeqalernissaannut isumaqataasoq, Atassutip siulittaasua, Gerhardt Petersen ima oqarpoq.
- Inatsisartut nutaamik ataatsimiittarfittaarnissat taaseqataaffigaarput. Kisianni paasissutissanik allatut nipeqartunik peqalernera pissutigalugu, tamassuma eqqartoqqinneqarsinnaaneranut soorunami peqataassaagut, Gerhardt Petersen oqarpoq.
Ataatsimiittarfissap Aqqaluup Aneerasaartarfianiitinneqannginnissaannik innuttaasut oqariartuutaat ataqqineqartariaqartoq, Partii Naleqqap siulittaasuata, Hans Enoksenip oqaatigaa.
- Ataatsimiittarfimmik pitsaasumik peqarnissarput tunngaviatigut isumaqataaffigaarput. Kisianni ataatsimiittarfik maanna atorneqartoq iluarsartuunneqarluni atuinnassappat, silarsuaq aserornavianngilaq, Hans Enoksen oqarpoq.
Partii Inuit siulittaasuata, Nikku Olsenip innuttaasut aamma paasilluarsinnaallugit oqaatigaa.
- Inatsisartut ataatsimiittarfiliuunneqarnissaannut tunngatillugu innuttaasut minnerpaamilluunniit peqataatinneqarnikuunngillat. Innuttaasullu tusaaneqanngittarnertik maanna qattuppaat, tassalu taasinerup inernerata tamanna takutippaa, Partii Inuit siulittasuat, Nikku Olsen taama oqarpoq.
Siumup Inatsisartuni politikkikkut oqaaseqartartuata, Karl-Kristian Krusep oqaatigaa, taasinerit inerneri Siulittaasoqarfimmut tunniunneqarnerisa kingorna, tamanna Siulittaasoqarfiup Inatsisartunut oqaluuserisassanngorteqqissagaa neriuutugalugu.
Inuit Ataqatigiit oqaaseqartinniaraluaratsigit taakku pissarsiarisinnaasimanngilagut.
