Taalliornikkut erinarsornikkullu meeqqat inuusuttullu oqaasinngortitsissasut
Nipilersortartoq, atuakkiortoq taalliortorlu Juaaka Lyberth meeqqanut inuusuttunullu Uummannap eqqaani juunip 17-ani tassaarsuaqarneranit eqqungaasunut pikkorissaaneratigut tamanna pissaaq.
Juaaka Lyberth Kalaallit Røde Korsiannit pikkorissaanissaq pillugu attavigineqarsimalluni oqarpoq.
- Saaffigineqarpunga tassaarsuarnermit eqqugaasut inuusuttaat meerartaallu sammisassaqartissinnaanissaat anguniarlugu siunnersuusiorsinnaannginnersunga. Saaffigineqarninnut patsisaagunarpoq meeqqanut erinarsuusiortarsimanera meeqqerivinnilu tusarnaartitsiartortarsiamnera. Juaaka Lyberth oqarpoq.
Siunnersuusiornermini aliikkusersuinerinnaq naammanngitsoq pingaartissimavaa.
- Meeqqat inuusuttuaqqallu peqataatinneqarnissaat pingaaruteqarpoq, taallatigut oqaasinngortitsinermikkut namminneq misigissutsimikkut iluaqutigissammatigit Juaaka Lyberth Kalaallit Røde Korsiat suleqatigalugu tusagassiorfinnut nalunaaruteqarluni allappoq.
Uummannami meeqqanut inuusuttunullu pikkorissaaneq ullumi aallartissaaq, aggustillu 13-iat ilanngullugu ingerlanneqassalluni. Pikkorissaaneq piareerpat peqataasut piumassappata takutitsisoqarnissaa pilersaarutigineqartoq Juaaka Lyberth oqarpoq.
