Syriamiut sakkutuuisa illoqarfik pingaarutilik tiguaqqikkaat

Syriamiut sakkutuui akersuutingaatsiareerlutik Syriap kujasissuani illoqarfik pilersaarusiornermut tunngatillugu pingaarutilik pikitsitsinianit tiguaqqippaat. Nutaarsiassaqartitsivik Reuters naapertorlugu, Syriami Inuttut pisinnaatitaaffiit pillugit nakkutilliisoqarfik taama ilisimatitsivoq.
Allattoq Ritzau
januaarip 26-at 2016 07:19

Illoqarfiup Sheikh Maskinip tiguaqqinneratigut illoqarfiit pingaarnersaannit Damaskusimit nunap kujasissuani akersuuffiusumut pilersuineq qulakkeerneqartoq nutaarsiassaqartitsivik aamma allappoq.

Sheikh Maskinip tiguaqqinneqarnera præsident Assadip sakkutuuisa ulluni kingullerni saassussisarnerisa iluatsilluartut ilagaat.

Illoqarfik Rabiya, nunap immikkoortuani Latakiami pikitsitsinianit aqunneqartut annersarisaat, sakkutuunit sapaatiummat tiguarneqarpoq. Tamannalu russit timmisartuinit sorsuutinit ikiorteqarluni pisimassugunartoq oqaatigineqarpoq.

Rabiya pikitsitsiniaqatigiinnit assigiinngitsunit præsident Bashar al-Assadimut illuatungiuliuttuusunit 2012-imiilli aqunneqalerpoq.

Assadip sakkutuuisa saassussinerat pivoq Syriami naalagaaffiup inuisa ukiuni sisamani imminnut sorsuunnerannik nunat tamalaat unitsitsiniarluartik suliniuteqaqqereersut.

Naalagaaffiit Peqatigiit Syriamut immikkut aallaartitaata, Staffan de Misturatip, nutaarsiassaqartitsivimmut AFP-mut ippassaq ataasinngornermi oqaatigaa Syriami eqqisseqatigiinnissaq pillugu isumaqatigiinniarnerit Schweitzimi illoqarfimmi Genèvemi tallimanngorpat aallartinneqarnissaat ilimagineqartoq.
 
/ritzau/Reuters