Syriamiu qimaasoq tammartajaartoq Savalimmiuni tigusarineqartoq
Qimaasoq taanna Danmarkimut utertinneqassasoq, Savalimmiuni nittartagaq nutaarsiassaqartitsivik Portal issuarlugu nittartakkami dagens.dk-mi allaaserineqarpoq.
Ikaartaat Norröna Thorshavnimut talimmat, Syriamiu angut 20-t missaannik ukiulik marlunngormat ullaakkut tigusarineqarpoq.
Ikaartaat Danmarkimi Hirtshalsimit Islandiliartoq Savalimmiunut aqqusaartuuvoq.
Angutip taassuma Islandiliarnissani pilersaarutigisimagaa politiit oqaatigaat. Angalanerali tassa Savalimmiunut killeqarpoq, Danmarkimullu utertinneqannginnermini Thorshavnimi parnaarussaanissani naatsorsuutigissallugu.
Ikaartaammik piginnittut Smyril Linep pisortaa Savalimmiuni nittartakkap nutaarsiassaqartitsiviup Portalip oqaloqatigisimavaa. Taassuma oqaatigaa, umiarsuaatileqatigiit ikaartaataannut toqqorlutik ilaasunik arlalinnik suli naammattuuisarlutik, taakkulu ilaat Syriamiuusut qimaasut.
Taakkuli Savalimmiuni qimaanissaminnik kissaateqarneq ajorput, Islandimulli qimaaniarsarinerminni Savalimmiunut aqqusaartuusartut taassuma oqaatigaa.
Taamali angalaniarsarisut piffissami kingullermi amerlanerulernerisa kinguneranik umiarsuaatileqatigiit periaatsiminnik sukaterisut, pisortap oqaatigaa.
