Sverigemi kunngip tamatigoortumik tusagassiinissaq ujartoraa

Sverigemi pissutsit pillugit nunanit assigiinngitsunit tusagassiortut arlaannaanulluunnit attuumassuteqaratik tusagassiisariaqartut, Sverigep kunngiata Carl Gustafip kaammattuutigaa.

USA-p præsidentiata, Donald Trumpip Sverigemi nunasisut ajornartorsiutigineqarnerat amerikamiut politikkiannut ilanngutereeraalu kunngikkormiut akuliupput.

Taamaattoqarnerani nunat tamalaat akornannit tusagassiortut Sverigemik ukkatarinnilerput.

Kunngi 70-inik ukiulik naapertorlugu, tusagassiortut arlallit tusagassiinerat ilumoorsaarnerunngilaq.

- Oqaluttuatsialaat tusarnissaat pingaaruteqarpoq.

- Tamannali ilumoorsaartoqartinnagu najoqqutassanillu isornartorsiuisoqartinnagu pisinnaanngilaq, kunngi aviisimut Sydsvenskanimut oqarpoq.

Stockholmimi illoqarfimmit qitiusumit Rinkebymit eqqissiviilliortoqarneranit assit Trumpip Sverige pillugu oqaaseqarneratigut nunarsuarmi tusagassiivitsigut siaruarterneqarput.

Sverigemi nunasisut pillugit ajunngitsunik aamma oqaluttuassaqartoq kunngip erseqqissaatigaa.

- Sverigemi ilinniartitaanermut ilisimatusarnermullu iluatsilluartumik siuttuuffeqarpoq, tamanna oqaluttuarissallugu pingaaruteqarpoq Sydsvenskanimut oqarpoq. 

Trumpip Sverige pillugu oqaaseqarnera oqallitsitsilerpoq. Sverigemi inuiaqatigiinni naligiinnerusumik atugarissaarlunilu inuusoqarnissaa nunat tamalaat akornanni tusagassiiviit ersersinniartarpaat.

Sverigemi nunasisimasut marloriaammik pinerluttartut amerlanerusut pinerlunnermut kisitsisini takuneqarsinnaavoq. Nunasisimasut akornanni aamma suliffissaaleqisoqarnerpaavoq. Nutaarsiassaqartitsivik AFP allaaserisaqarpoq.

Tunniutiinnannginnissarput pingaaruteqarpoq, ukiut kingulliit 40-t sinnerlugit tamanna sulissutivara, kunngi Carl Gustaf Sydsvenskanimut oqarpoq.

/ritzau/