Assi: Oline Nielsen/Facebook

Kommuni Suut tamaasa taarsersinnaanngilagut

Tassaarsuaqarnerani kingornalu pigisaminnik annaasaqarsimasut pisortanit atortutigut ikiorserneqarput initaartinneqarallarlutillu. Tamarmilli pisattatik tamakkerlugit taartissarsissanngilaat, inuuniarnermilli pisariaqarnerpaaginnarnik ikiorneqassasut, Qaasuitsup Kommuniata oqaatigaa.

- Ilaqutariit ingerlariaqqinnissaat siunertaralugu ikiorsiineq ingerlanniarneqarpoq, Qaasuitsup Kommuniani inuussutissarsiornermut pisortaq Hans Peter Lennert oqarpoq.

Karrat Kangerluanni tassaarsuaq: Maanna susoqarpa?
Junip 17-anni ajunaarnersuaq nunatta oqaluttuarisaanerani annersaavoq.

 

Tassaarsuarmit eqqugaasut oqaloqatigiartorlugit novembarip qaammataani KNR Uummannamiippoq.

 

Pisut oqaluttuarinerat KNR-imi maani malinnaavigisinnavat.

Nuugaatsiap Illorsuillu inui 170-it missaanniittut nunaqarfimminnit qimagutitinneqaramik pigisatik tamaasa qimaannartariaqarsimavaat.

Soorlu illut, atisat, umiatsiat piniutillu allat, pequttat, meeqqat pinnguai tammajuitsorpassuillu.

AAMMA ATUARUK Illut aappaagu juullertinnagu piariissasut

AAMMA ATUARUK Aalisartut piniartullu annaasamminnik taarsiiffigitissapput

Issittumi Sakkutooqarfik kommunillu upalungaarsimasuutitai nunaqarfimmiut pigisaannik kingorna aallerput, pisattalli tamakkersinnaasimanngilaat.

Atortut atisallu innuttaasunit tunissutigineqartorpassuit saniatigut, Kalaallit Røde Korsiat pisortallu tamakkuninnga aamma ikiorsiissuteqarput.

Inuuniarnermi pisariaqarnerpaat kisiisa

Kisianni pisattatik tamakkerlugit taartissarsinavianngikkaat, kommuni oqarpoq.

- Uani oqariartuutigisariaqarpoq una taarsiiniarnerunngimmat, kisianni ikiorsiiniarnerummat.

Qimagutitinneqarsimasorpassuit ikiorneqarnertik nuannaarutigaat, kisianni aamma annaasarpassuaqarnertik erloqinartorsiutigaat.

 

Kalaallit Røde Korsiat Uummannami sullivimmi atisanik pinngussanillu aggustimi agguaavoq. Assi: Kalaallit Røde Korsiat.

 

Taakkununnga ilaavoq Nuugaatsiarmiu Aaqa Jensen. Ilaqutariit pisattaminnik annaasaqaqaat, soorlu umiatsiat marluk qamuteralaallu. Angallatit, sulerulullutik pissarsiarisimasaat.

Pisortanilli umiatsiamik taamaallaat ataatsimik tunineqarsinnaasimapput.

- Sooruna taarsiivigineqarnissamik pineqareerluta ilaannakortumik, tamakkiisumiunngitsoq, taarsiisoqartariaqartoq? 

Aaqa Jensen taama oqarpoq.

Kisianni inuuniarnermi piariaqarnerpaaginnarnik ikiorneqassasut, kommuni oqarpoq. Tassalu assersuutigalugu arlariiaanik angallateqarsimagunik, tamaasalu annaallugit, pisortanit ataasiinnarmik ikiorserneqassasut, pisortat aalajangerpaat.

AAMMA ATUARUK Tassaarsuup kingorna Pilersuisoq isertitaqarnerusoq

AAMMA ATUARUK Ajunaarnersuarmut aningaasartuutit nunap karsianit pissarsiarineqassasut

- Ulluinnarni inuunerup ingerlariaqqinnissaa aammalu ulluinnarni inuussutissarsiornerup ingerlariaqqinnissaa tassanngaanniillu inuit namminneq pilersorlutik ingerlariaqqinnissaat angorusukkatsigu, Hans Peter Lennert oqarpoq.

Pisortat Namminersorlutik Oqartussat sulisuminnik inissiigallarnerminnik qanoq pequtaqarnissaannik allattugaataat malillugu pequtsersuipput. 

- Taamaattumik ilaasa annaasarpassui pisattat tamakkerlugit tunniussinnaanngilagut aamma taamaaliussagutta suliaq qaqugumorsuaq naammassinavianngilaq, Qaasuitsup Kommuniani inuussutissarsiornermut pisortaq Hans Peter Lennert oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!