Sungiusaasut ilinniaqqittut

Rene Olsen, sungiusaallammattut timersoqatigiit kattuffiannit toqqarneqartoq aamma arnat nuna tamakkerlugu sungiusaasuat Bent Petersen UEFA B-Licence-mik taaneqartartumi misilitsinnerminni angusipput. Taamaasillutik pikkorinnerni sungiusaasutut allagartaqalernissamut alloriaqqipput.

Danmarkimi arsaattartut kattuffissuanni DBU-mi ilitsersuisoq Ole Keldorf  nunatsinni angalaarpoq sungiusaasunik pikkorissaalluni. Periarfissaq iluatsillugu Bent Petersen Rene Olsen soraarummeertippai. Atuagarsornermi nalunaaquttap akunneri marluk misilitseriarlutik sungiusaanermi nalunaaquttap akunnera ataaseq misilitsipput.

- Bent Petersen Rene Olsen maanna ukiuni aggersuni periarfissaqalerput DBUp ataani A-mik ilinniarnermut qinnuteqarnissamut – ilinniartutut tiguneqassagunik Danmarkimut arlaleriarlutik angalasassapput A-mi ilinniartut peqataaffigiartorlugit aammalu periarfissaqassallutik paasisassarsiorlutik Europa-mi nunat arlaannut paasisassarsiornissamut,  GBU'p siulittaasua Lars Lundblad Jens Tang Olesen sungiusaasunik pikkorissaanermi ataqatigiissarisoq nalunaarput.