Sungiusaammik suliffissat isumaqatigiinngissutaasut
- Iperaatalerluni pinngitsaaliilluni ilinniartoqarnerulernissamik anguniagaqarneq taanna atorsinnaanngitsutut isigigatsigu, GE-mi siunnersorti Bent Sørensen oqarpoq.
Suliffeqarnermut naalakkersuisup Vittus Qujaukitsup suliffeqarfiit namminersortut pisortallu ingerlatsivii ilinniartunik sungiusaammillu sulisussanik nunaqavissunik ikinnerpaaffissalikkamik atorfeqartitsinissaannut pisussaaffilerniarpai.
Aamma atuaruk GE: Sanaartorneq pitsaanerusumik pilersaarusiorneqartariaqarpoq
Suliffeqarfinni tamani sulisut ilinniartunik sungiusaammillu sulisussanik 7,5 procentinik sulisoqarnissaat piumasarineqarpoq. Soorlu assersuutigalugu sulisut 12-25-ugaangata minnerpaamik ataatsimik ilinniartoqartassasut inassutiginiarneqarluni.
Suliffeqarfik pisussaaffimminut maleruaanngikkuni aningaasaateqarfimmut pilersinneqaqqammersumut akiliuteqartassasoq, akiliutigineqartullu ilinniartut sungiusaammillu allatigut suliffeqartunut aningaasaateqarfimmut nakkartinneqartassasut, siunnersuummi erserpoq.
Tamannali inatsisitigut akitsuusersuiniarnerusoq, GE isumaqarpoq.
- Siunnersuummi uani allaanngilaq akiliisitsiniartumik aallaaveqartumik ilinniartunik amerlanerusunik pinngitsaaliilluni tiguseqqusillutik siunnersuuteqartut, Bent Sørensen oqarpoq.
Aamma atuaruk Oqartussat immikkut iliuuseqarnialerput
Inatsisissatut siunnersuut immikkoortuuvoq ilinniartitaanermut naalakkersuisoqarfiup ataaniinngitsoq tamannalu GE-p SIK-llu aarlerinartoqartippaat, naalakkersuisoqarfiummi, ilinniarfiit suliffeqarfiillu akornanni suleqatigiinnerat akornguserneqarsinnaammat.
Suliffeqarfiit sulisuisa ilinniagaqarsimassunissaat aamma isiginiarneqanngitsoq SIK-p GE-tulli isoraa. Ilinniartullu amerlanerusut sulilissappata ilinniarsimasunik naammattunik sulisoqarnissaq qulakkeerneqaqqaartariaqartoq, SIK-mi siulittaasup tullia Kasper Larsen isumaqarpoq.
Sungiusaammik suliffissat amerlineqarnissaat isumaqatigigitsik, GE SIK-lu erseqqissaapput. Tamannali anguniarlugu ilinniartitaanermut naalakkersuisoqarfik suleqatigiissitaliortoqaqqaartariaqartoq, taakku isumaqarput.
