Qeqertalik: Sumiiffinni oqartussaaneq aallukkaat

Ataatsimiititaliat sisamaassasut kalaallisullu taaguuteqassasut, Qaasuitsup Kommuniata ikaarsaariarnermut ataatsimiititaliaata sapaammi ataatsimiinnermini aalajangiuppaa.

- Uagut avatangiisitsinnut kulturitsinnullu naleqquttunik, nammineq pilersitatsinnik, eqqarsartarnitsinnut tulluuttunik pilersitserusukkatta, taamatut pilersitsivugut, Kommune Qeqertalimmi ikaarsariarnermut ataatsimiititaliap siulittaasua, kommunimilu tassani borgmesterinngortussaq, Ane Hansen, KNR-imut oqarpoq. 

Ataatsimiititaliat kalaallisuinnaq taaguuserneqartut tassaapput Inuit, Timi Tarnilu, Inoqarfik Inualu.
Meeqqanut, Utoqqarnut Atuarfeqarnermullu ataatsimiititaliap "Inuit" taaguutigilissavaa. 
Kultureqarnermut Sunngiffimmullu ataatsimiititaliap "Timi Tarnilu" taaguutigilissallugu.
Sanaartornermut, Avatangiisinut Suliffeqarnermullu ataatsimiititaliap "Inoqarfik" taaguutigilissavaa.

Taassuma saniatigut Kommune Qeqertallip aningaasaqarnermut aqutsisoqarfissaa "Inua"-mik taaguuteqalerpoq.
Ataatsimiititaliat, sapaammi ataatsimiissutigineqartut, Ikaarsaariarnermut Ataatsimiititaliamit isumaqatigiissumit akuerineqarput.

Kommunip suliassaasa taamatut aaqqissuunnerisigut kommunissami ingerlatsinerup pisariitsuunissaa akisunngitsuunissaalu ikaarsaariarnermi ataatsimiititaliap anguniaraa, Ane Hansen oqarpoq:

- Qullersaqarfimmi suna tamarmi eqiterneqassanngilaq aamma aalajangiinerit tamarmik tassaniissanngillat.
Kommunalbestyrelsip akisussaaffiit siammarumallugit aningaasatigut sinaakkusiortassaaq, sumiiffinnilu siunnersuisoqatigiit sinaakkutaliussat iluanni sulisassapput. 

- Ukiumoortumik missingersuusioraangamik, taakkua akuerisat aallaavigalugit, illoqarfiit tamarmik immikkut aalajangiisinnaassuseqarlutik inissisimassapput, Ane Hansen oqarpoq.