Sumiginnagaagaluarluni angusarissaartoqarsinnaavoq

Bachelorinngortut 45-t kandidatinngortullu arfineq-pingasut ilinniakkamik naammassinninnerminni uppernarsaammik allagartartaarmata Naja Carina Steenholdt allagartartaartut ilagaat. Taanna kandidatini angusarinnersaavoq, tassungalu atatillugu nunaqqatiminut oqariartuutissaqarpoq.
Allattoq Mads Pedersen
februaarip 24-at 2017 15:34

Meeraanermi sumiginnagaasimagaluaraanniluunniit inuunermi angusarissaartoqarsinnaaneranut Naja Carina Steenholdt uppernarsaataavoq. Taanna Nunatsinni ilinniarfiit qaffasinnersaanni Ilisimatusarfimmi kandidatitut allagartartaarpoq. 

Taanna aamma kandidatinngortuni agguaqatigiissillugit karakteriginnerpaatut nersornaaserneqarpoq.

Inuunerli oqitsuinnaasimanngilaq. Naja Carina Steenholdt meeqqat illuanni meeraanikuusimavoq. Ullumilu nuannaarneq initugaluartoq Nunatsinni meeqqat sumiginnakkat amerlaqisut uummammiorai. 

- Soorunami tulluusimaarlungalu nuannaarpunga. Taamaattorli peroriartornera eqqarsaatigalugu eqqarsaaterpassuit sarsuapput. Kissaatigaaralu meerarpassuit sumiginnakkat oqariartuuteqarfiginissai, Naja Carina Steenholdt KNR-imut oqarpoq. 

- Meeqqat illuanni meerarsiatullu peroriartorsimagaluaraanniluunniit inuunermi angisuunik pitsaasunillu angusaqartoqarsinnaaneranik takussutissaavunga, Naja Carina Steenholdt oqarpoq. 

Naja Carina Steenholdt angusarissaarnerminut Sulisitsisunit akissassitinneqarpoq. Kandidatini angusarinnerpaalluni agguaqatigiissillugit 10,2-mik karaktereqarami.

Manna Naja Carinap ulloq nuannersumik atorniarpaa, kingornalu atorfimmini sulinini nangeqqissallugu.

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq