Sume pillugu filmi nunarsuaq tamakkerlugu angalaalerpoq

Sumep 1970-ikkunni nunarsuarmi tusarnaartitsiartoqattaarluni angalanissaq naaggaagaa, nipilersoqatigiit pillugit filmiliaq piviusulersaarut maanna taakku sinnerlugit nunarsuaq tamakkerlugu angalanialinnguatsiarpoq.
marsip 02-at 2015 17:10
Nutserisoq Erna Lynge

Filmiliortitseqatigiiffiup Anorak Filmip nunarsuaq tamakkerlugu filmfestivalit soqutigininnerujussuat nalaappaa. Filmi SUME Berlinimi filmfestivaleqarnerani ataqqinaataasumi Berlinalimi takutinneqareersorlu taama pisoqarpoq.

Filmiliortoq Emile Hertling Peronard KNR-imut allakkamini taama unnersiorpoq.

Filmi nunarsuarmioqatitsinnit eqiingaffigineqalerpoq

Filmfestivalimi ilisimaneqartutut filmi akissarsitinneqanngilaq, filmilli takutinneqaqqaarnerata kingorna ilasseqatigiinnerni filmiliortartut peqatigiiffiat film.gl suleqatigalugu takoqqusaarisoqarnerani, filmi nunarsuarmioqatitsinnit eqiingaffigineqartupilussuanngorpoq.

SUME MUMISITSINERUP NIPAA taamaalilluni qaammatini aggersuni Australiami, New Zealandimi, Ungarnimi, Ruslandimi, Argentinami Islandimilu festivalini assigiinngitsuni takutinneqartassaaq.

Ullullu tamangajaasa nutaanik saaffiginnittoqartartoq, Emile Hertling Peronard oqaluttuarpoq.

Aningaasatigut iluanaarutaanngilaq

Taamaakkaluartoq aningaasatigut iluanaarutaanngilaq. Filmfestivalini takutikkaangamikku 2.000 koruunit missaannik akilissarsigajupput, amerlanerpaartaatigullu filmiliortut angalanissaannut tapiisoqassanani. Taamaattumillu filmimut akisussaasut marluusut angalaqattaartinneqartaratik, kisianni tamanna aamma ajunngitsoq ilitsersuisua Inuk Silis Høegh oqarpoq:

- Uatsinnut pingaarneruvoq filmi sapinngisanik amerlasuunit takuneqarnissaa. Aammalu Sume pillugu oqaluttuaq, Kalaallit Nunaatalu ukiuni kingullerni 40-ni ineriartorsimanera nunarsuarmioqatitsinnit sapinngisamik amerlasuunit takuneqarnissaa.

- Filmi nunani allani takutinneqareeraangat, inuit ornigartarpaatigut oqaluttuarlutillu, filmip takunnginnerani qanoq annikitsigisumik Kalaallit Nunaat pillugu ilisimasaqarsimallutik. Nuannaarutigaarput filmip nunarsuarmi tamarmi Kalaallit Nunaat ilisimaneqarnerutileqataatimmagu. Minnerunngitsumillu Sumep nipilersugai ilisimaneqartilersimammagit, sumiluunniit qiimmataatigineqartarput, ilitsersuisua Inuk Silis Høegh oqarpoq.