Sulorartartut pingasoriarlutik ujaminnanniutissapput

Sulorarnermi arnat angutillu akuleriillutik iligiiaarneranni kvart finale kipitinneqarpoq Savalimmiormioq ajoqusermat. Taamaasillutik kalaallit inuusuttut Jens Frederik Nielsen aamma Ivalu Olsen semifinalemut anngupput, tassanili Paul Le Toq aamma Sarah Gabutt Guernsey-meersut ajorsarfigaat.

Arnat angutillu akuleriillutik iligiiaarneranni Jens Frederik Nielsen aamma Ivalu Olsen nunatsinneersuni ingerlalluarnersaapput. Mads Nyvold aamma Anja Skov siusissukkut ajorsaramik peqataajunnaarput. Sulorartartut taamaasillutik pingasoriarlutik tallimanngornermi ujaminnanniuttussanngorput. Angutit ataasiakkaarneranni  Bror Madsen finalessaaq, arnat ataasiakkaarneranni Sara Lindskov Jacobsen bronzennanniutissaaq kiisalu Jens Frederik Nielsen aamma Ivalu Olsen bronzennaniutissallutik.

Arnat arsaattartut Western Islesimut bronzennanniutissapput taakkulu Isle of Manimut 4-0-mik ajorsarnikuupput.  Isle of Man kalaallinut 3-1-mik ajugaavoq taamaammat kalaallit arnartaat suli neriuuteqarput ujaminnassinnaanissaminnut. Semifinalemi aallartilluaraluarput muminnermi 0-0-mik naligiiginnarlutik. Mumereernermili Ålandimiut tulleriiginnarnik måleqattaarput taamalu 6-1-mik ajugaallutik. Kalaallini isertitsisuuvoq Aviana Reimer.

Angutit arsaattartut normu 11-nngorput Western Isles 1-0-mik ajugaaffigigamikku unamminermilu isertitatuaq Anders H. Petersenip isertippaa. Kalaallit normu 9-nngorniuttussaagaluarput Rhodos unammersuarnernit anisitaammat. Allanngortinniarlugu timersoqatigiit kattuffiat noqqaasimagaluarpoq aaqqissuisunilli tusaaneqaratik.

Arnat volleyballertartut normu 8-nngorput unamminermi kingullermi Bermuda 2-3-mik ajorsarfigalugu. Angutit normu 7-nngorput Bermuda ajugaaffigereerlugu 3-0-mik. Arnani angutinilu finalertussanngorput Saaremaa aamma Savalimmiormiut taakkulu unammersuartuni malunnartumik allanit kakkannerupput.