Sulorarneq: 15-inik ukiullip inersimasut ajorsartippai
Nuka Mark Nielsen 15-inik ukioqartoq Narsameersorlu sulorallaqqilluinnartuuvoq. Arctic Winter Gamesimi siorna Whitehorsemi ingerlanneqartumi arlalinnik ujaminnappoq maannalu aamma Kujataani pissartanngorniuttoqarnerani qanittukkut ingerlanneqartuni inersimasuni pingasunik kuultinnalluni.
- Tamatuma nassuiaatissartaata ilarujussua tassaavoq timersoqatigiiffitsinni unammisartunik inuusuttunik pitsaasumik isumaginninnissatsinnik pingaartitaqaratta. Tamanna maanna inerititaqarfiulerpoq pissartanngorniuunnernilu assigiinngitsuni timersoqatigiiffipput pitsaasunik angusaqartarluni, Anga Peter Edvardtsen, Narsami Arsarnerini sungiusaasoq oqaluttuarpoq.
Nuka Mark Nielsen U-17-ini inersimasunilu peqataavoq. Angutit ataasiakkaarneranni, angutit arnallu akuleriillutik iligiiaarneranni inersimasullu iligiiaarneranni kuultinnappoq. U-17-imili angutit ataasiakkaarneranni sølvinnappoq, iligiiaarnermi peqatigisaminut Martin Sikemsenimut Arsarnerineersumut ajorsarami.
U-17-imi unammisartoq Cecilie Josefsen, siorna Arctic Winter Gamesimut aamma peqataasoq, inersimasuni U-17-inilu aamma peqataavoq. Arnat iligiiaarneranni aamma arnat iligiiaarneranni kuultinnappoq, klubbeqatiminulli Maria Lyberthimut arnat ataasiakkaarneranni ajorsarluni. Cecilie Josefsen U-17-ini arnat ataasiakkaarneranni aamma kuultinnappoq.
- Inuusuttut pikkorissut suli amerlanerusut pigaavut. Taakkulu ukiut marlussuit qaangiuppata qanoq ingerlassanersut assut pissanngatigivara, Anga Peter Edvardtsen naammagisimaaqaluni oqarpoq.
Narsaq kisiartaalluni Kujataani sulorarnermik inerisaanngilaq. Nanortalik aamma siorna septembarip qaammataani sulorarnermik ilinniartitsisoqareernerata kingorna arlalinnik unammisartoqalersimavoq.
