Qaasuitsup: Sulisut 22-t nuunneqassapput
Qaasuitsup Kommuniani sulisut kommunini sorlermi sulilerumaarnissartik pillugu sulisitsisuminnit maanna paasissutissinneqaleruttorput.
Avannaata Kommunia 63-inik sulisoqassaaq Kommune Qeqertalillu 43-nik sulisoqassalluni.
Sulisut Qaasuitsup Kommunianeersut 22-t Kommune Qeqertalimmut, tassa Aasiannut nuussinnaanissamik neqeroorfigineqareersut, Qaasuitsup Kommuniani pisortaaneq Hans Eriksen KNR-imut paasissutissiivoq.
Qaasuitsup Kommunia ukiortaamiit avinneqarpat, Avannaata Kommunia Ilulissani allaffeqassaaq Kommune Qeqertalillu Aasianni allaffeqassalluni.
Sulisut ullaaq manna qulingiluanut qiteqquttoq ataatsimeeqatigineqarput.
Sulisulli sorliit Ilulissanut Aasiannulluunniit nuunneqalernersut pillugit paasissutissat KNR-imit suli pissarsiarinngilagut.
Sulisut pineqartut sulisitsisuminnit aatsaat nalunaarfigineqareerpata, kommuni agguataarineq pillugu sukumiinerusumik avammut paasissutissiissasoq, Hans Eriksen oqarpoq.
